צום ערשט, אפשר קענט איר אויפקלערן וואס איז דער אמט פון טאון סופּערווייזער?

אפיציעל מיינט אז "הויפּט ערוויילטער און הויפּט עקזעקוטיוו אפיציר פונעם טאון אוו פאלסבורג".

דאס באדייט אז איך האב אן אויפזיכט אויף אלע דעפּארטמענטס און זייערע פירער - וועלכע האבן אן אויפזיכט צוצוגרייטן דעם יערליכן בודזשעט, און אויסצופירן די פּאליסיס וואס ווערן אנטשידן אינעם סיטי קאונסיל.

איז דאס א "פול טיים" דזשאב? אויב נישט, וואס נאך טוט איר?

ס'איז נישט קיין "פול טיים" פּאזיציע, אבער איך שטיי גרייט און איך בין אין פארבינדונג מיט מיין שטאב און מיט אלע דעפּארטמענט פירער דורכאויס 7-24; פּערזענליך, דורך אימעיל און דורכ'ן טעלעפאן.

איך בין אויך א פּריוואטער אדוואקאט, קאנצענטרירט אויף ריעל עסטעיט געזעצן. כ'האב "לאקאל" שטודירט און גראדואירט, צום ערשט פון פאלסבורג היי-סקול אין 97', און דערנאך פון האפסטרא אוניווערזיטעט. כ'בין לייסענד צו פּראקטיצירן געזעץ אין ניו יארק סטעיט.

כ'וויל דערביי באטאנען, אז מיין ערשטער דזשאב אלס יוגענטליכער איז געווען, אלס א "וועיטער" אין לאקאלע האטעלן, ווי "קאנקארד", "קוטשער'ס", "ראלי", און איבערהויפּט אין "פּיינס", וואס איז געווען אין פאלסבורג. ס'איז געווען אין די אמאליגע א.ג. "בארשט בעלט" יארן, און כ'פלעג אסאך מיטהאלטן די אויפטריטן פון דעם וויצלער דזשעקי מעיסאן, וועלכער איז אצינד געשטארבן. די ערפארונג אלס "וועיטער" האט מיך צוגעגרייט צו קענען בעסער זיך באקענען און פארשטיין פארשידענע סארט מענטשן; כ'מיין אז ס'איז א גוטע זאך פאר יעדן צו פּרובירן...

וואס זענען אייערע הויפּט עררייכונגען אלס סופּערווייזער?

צום אלעם ערשט, בין איך שטאלץ פון אונזער שטארקער פינאנציעלער ווירטשאפט. מיר האבן נישט קיין קאנטראל אויף די בודזשעטן פון אונזער לאקאלן סקול דיסטריקט אדער די קאונטי, אבער אונזער טאון באורד האט דורכגעפירט בודזשעטן אין איינקלאנג אדער נאך ווייניגער ווי די פארלאנגטע "טעקס קעפּס" יערליך. היי-יאר האבן מיר באשטעטיגט א בודזשעט מיט א זערא פּראצענט העכערונג! מיר ערווארטן צוצושטעלן אזא בודזשעט אויך אינעם קומענדיגן יאר. מיר קענען דאס טאן ווייל מיר האבן געזונטע פאנד באלאנסן און מיר אידענטיפיצירן פּאטענציאלע איינקונפטן און איינשפּארונגען.

באזונדער האבן מיר פארבעסערט און פארברייטערט אונזערע פּארק'ס, ווי אויך די וואסער און סוער אינפראסטרוקטור - וואס מיר האבן דערין אינוועסטירט איבער 50 מיליאן דאלאר, און מיר ערווארטן נאכמער פארבעסערונגען אין די קומענדיגע צוויי יאר, וואס וועט ערמעגליכן צו פארברייטערן דעם טאון. מיר מוזן נאכקומען דעם פאקט אז יאר-נאך-יאר זינט איך בין געווארן סופּערווייזער, זענען צוגעקומען טויזנטער פאמיליעס אינעם טאון.

מיר האבן אויך פארבעסערט אונזער "רעילס טו טרעילס", און מיר האבן איינגעשטעלט א מולטי-יאר פארברייטערונג, וואס ווען ס'וועט זיין פארטיג וועלן איינוואוינער און טוריסטן זיך קענען באנוצן מיט א 13 מייל "טרעיל" וואס וועט לויפן פון מאונטענדעיל ביז דעם גרעניץ פון פאלסבורג-ליבערטי, און וועט איינשליסן דעם הערליכן נעווערסינק ריווער.

מיר האבן דאס געקענט דורכפירן א דאנק אונזערע מעגליכקייטן צו אידענטיפיצירן, פארלאנגען און באקומען גרענטס און הילף אינעם ווערד פון צענדליגער מיליאנען דאלארן.

פיל פון די זומער-באזוכער, איבערהויפּט די אידישע געמיינדע, שפּירט אז אסאך פון די לאקאלע מענטשן און פּאליטישאנס זענען נישט אזוי צופרידן ווען די זומער-איינוואוינער קומען ארויף צו די קעטסקילס; וואס איז זייער מיינונג דערוועגן?

צום אלעם ערשט וועל איך פארשטעלן די רויע פאקטן: איבער 40 פּראצענט פון אונזערע שטייער איינקונפטן איז פון די "צווייטע-היים קאמיוניטי" (מענטשן וואס האבן זומער-הייזער), וואס דאס באשטייט הויפּטזעכליך פון ארטאדאקסישע אידישע פאמיליעס. איבער א דריטל היים-אייגענטימער אינעם טאון אידענטיפיצירן זיך אלס אידן. דאס וואס איר באצייכנט אלס "באזוכער", זענען פאקטיש "איינוואוינער"; אונזערע שכנים און אונזערע פריינט.

די באפעלקערונג וואקסט יעדן זומער-סעזאן, און ס'גייט שוין אזוי אן צענדליגער יארן. דאס שטעלט פאר געוויסע "טשעלענדזשעס", אבער איך בין צופרידן נאכצוקומען אזעלכע אויפגאבעס, און א באדייטנדער טייל פון מיין דזשאב איז טאקע צוצוגרייטן אונזערע טאון סיסטעמען צו קענען אקאמאדירן דעם אריינפלוס פון מענטשן.

צומאל מאכן מיר טעותים, אבער מיר לערנען זיך דערפון און מיר גרייטן זיך בעסער צו צום קומענדיגן מאל. מיר זענען שטארק קאנצענטרירט דאס צו קענען נאכקומען און יעדן אקאמאדירן, ווייל דאס איז לעבנסוויכטיג פאר אונזער עקאנאמיע און קולטור.

פאריגן זומער האבן א סאך פון די זומער-איינוואוינער געשפּירט אז די לאקאלע פּאליטישאנס, אייך אריינגערעכנט, האבן נישט געוואלט אז זיי זאלן ארויפקומען קיין אפּסטעיט צוליב קאוויד-19. מענטשן האבן נישט געגליכן אז זיי ווערן באהאנדלט אנדערש ווי די לאקאלע איינוואוינער. כדי קלאר צו שטעלן דעם רעקארד, האט איר געוואלט אז די זומער-איינוואוינער זאלן קומען צו די קעטסקילס פאריגן זומער און אז די קעמפּ'ס זאלן זיין אפען?

מיין רעקארד איבער קאוויד-19 און נעמען די ריכטיגע פארזיכערונג מיטלען איז זייער קלאר, און איך וועל עס קלארשטעלן. קוקנדיג אויף צוריק צו אפּריל און מאי פון 20', האט דער וויירוס געבוזשעוועט דורכאויס ניו יארק סטעיט, אבער נאכמער אין די מעטראפּאליע פון ניו יארק סיטי. עס זענען נישט געווען קיין באשטעטיגטע מעדיצינען און וואקסינען. אלס סופּערווייזער פונעם טאון אוו פאלסבורג און באאמטער אין סאליווען קאונטי, איז מיין אפיציעלע הויפּט אויפגאבע זיך צו זארגן אוי'פן "געזונטהייט, וואוילזיין און זיכערהייט" פון אונזערע איינוואוינער; דאס שליסט איין די טויזנטער ארטאדאקסישע צווייטע-היים אייגנטימער וועלכע וואוינען אין אונזער טאון.

אונזער קאונטי האט געהאט בלויז 19 "אינטענסיוו קעיר" בעטן, און לויט די ערווארטונגען וואלטן מיר נישט געקענט אקאמאדירן מענטשן וואס וואלטן קראנק געווארן. אין קאנטראסט צו מיזילס און אנדערע אינפעקשאנס פון די פריערדיגע יארן, וואס זענען געווען געאגראפיש באגרעניצט, האבן מיר מורא געהאט אז מיט קאוויד-19 וועלן מיר נישט קענען אריבערפירן פּאציענטן צו די שפּיטעלער אין ניו יארק סיטי, וואס זענען שוין געווען איבערגעפולט.

צוליב דעם דאזיגן זארג, בין איך געווען קעגן עפענען באנגעלאו-קאלאניעס און קעמפּ'ס. ס'איז געווען א זארג פאר'ן געזונטהייט און וואוילזיין פון אונזערע איינוואוינער, אריינגערעכנט די צווייטע-היים אייגנטימער וואס האבן געזוכט אוועקצוגיין פון די שטאט און ארויפקומען צו די קעטסקילס. אין יעדן מעסעדזש האב איך טאקע געזאגט אז מיר וועלן גערן אנטפאנגען יעדן איינוואוינער וואס האט א הויז, אז ער זאל ארויסקומען און זיך דא אויפהאלטן.

אצינד האלטן מיר איין יאר שפּעטער; מיר האבן א וואקסין, באהאנדלונגען און פּראטאקאלן. איך בין שטאלץ און צופרידן צו אנטפאנגען יעדן וואס וויל קומען אין באנגעלאו-קאלאניעס און קינדער אין קעמפּ'ס. איך וויל טאקע באטאנען אז מיר האבן היי-יאר א רעקארד צאל מענטשן וואס זענען געקומען קיין פאלסבורג, און איך טו אלעס מעגליך אז זיי זאלן זיך שפּירן גוט און באקוועם.

אויב איר וועט געווינען די קומענדיגע וואלן און בלייבן טאון סופּערווייזער, וואס וועלן זיין אייערע הויפּט פּריאריטעטן?

די זיכערהייט און לעבנס-קוואליטעט פון יעדן איינוואוינער אין די טאון. איך וועל ווייטער שטיין פעסט אויף די פינאנצן, צו רעדוצירן אויסגאבן - סיידן אויף די אינפראסטרוקטור פּראיעקטן.

אינעם פארגאנגענעם יאר האב איך זיך אויך געלערנט אז מיר דארפן אינוועסטירן מער צייט און באמיאונגען אין אונזער "אוטרידזש" מיט די ארטאדאקסישע אידישע געמיינדע. איך בין פארפליכטעט צו שאפן די פּאסיגע "ליעזאנס" וואס וועלן קאמיוניקירן דירעקט מיט די פארשידענע טיילן פון די קאמיוניטי, אריינגערעכנט די קעמפּ'ס, ביזנעס און היים-אייגענטימער. דורך וויסן וואס מען ווייסט נישט און צו זוכן זיך צו לערנען, איז דער בעסטער וועג צו טרעפן א צוזאמענארבעט. דאס איז עפּעס וואס איך האב געטאן אין לויף פון 12 יאר, יעדן טאג, און איך וועל פארזעצן דאס צו טאן אינעם צוקונפט.

דער מאנגעל אין פּארקינג איז גאר א גרויסע טעמע דורכאויס די זומער חדשים. אין סאוט פאלסבורג איז נישט פארהאן וואו זיך אפּצושטעלן, און דער פּארקינג לאט אינמיטן וואודבוירן איז א חורבן. איז פארהאן עפּעס וואס די טאון קען טאן דאס צו פארבעסערן?

פּארקינג איז די צווייטע טעמע נאך די טראפיק טעמע, וואס דאס איז א ריכטיגער קריזיס. אונזער הויפּט ציל איז, אז דער טראפיק זאל פליסן דורכאויס אלע געגנטער, צו ערמעגליכן אז עמוירדזשענסי סערוויס, ווי פייער און פּאליציי, זאלן קענען דורכגיין אויב נויטיג. די "דעליניעטארס" (די אוועקגעשטעלטע רויטע-בלאקאדעס ביים זייט פון די שאסייען)  זענען געצילט צו פארמיידן אז מענטשן זאלן זיך אפּשטעלן ביי די זייטן פון שאסייען, וואס דאס שאפט טראפיק און עקסידענטס, ווייל אנדערע קארס זענען געצווינגען ארומצופארן די דאזיגע קארס.

מיר האבן דריי-פאכיג געהעכערט די צאל פּארקינג ערטער סיי אין סאוט פאלסבורג און אויך אין וואודבוירן אין די פארגאנגענע יארן, און מיר וועלן פארזעצן דאס צו טאן. אינעם קומענדיגן יאר וועלן מיר אריבערפירן "אינגבער פּארק" צו אן אנדערן ארט, כדי צו פארברייטערן דעם פּארקינג לאט אין סאוט פאלסבורג, און מיר וועלן פארהאנדלען מיט לאנד-אייגענטימער אין וואודבוירן צו פארברייטערן דעם דארטיגן פּארקינג לאט.

פאריגע וואך האט די וואודבוירן שוהל אפּגעצייכנט איר 100'סטער יארטאג, און הרב יונגרייז האט יעדן איינגעשלאסן אין דעם פרייליכן מעמד. וואס איז געווען אייער צוזאמענארבייט דערמיט?

ס'איז נישט אלעמאל וואס מען קען בייוואוינען ווען אייערע פריינט זענען אזוי בשמחה. איך בין געווען צופרידן מיטצוהאלטן דעם פארזאמלונג מיט הרב יונגרייז און די הונדערטער מענטשן וואס זענען געקומען זיך מיטפרייען. איך בין אויך שטארק דאנקבאר פאר הרב יונגרייז און זיין פאמיליע פאר די אויסערגעווענליכע קאאפּעראציע וואס ער שטעלט צו פאר אונזערע פּאליציי אגענטורן. איך בין דאנקבאר פאר אונזער פּאליציי דעפּארטמענט, אנגעפירט דורך טשיף וויליאמס, וואס האט ערמעגליכט א זיכערן טראפיק-פלוס. מיר זענען דאנקבאר פאר די הילף וואס מיר האבן באקומען פון די ניו יארק סטעיט פּאליציי און אונזער שעריף'ס דעפּארטמענט, און איך בין גאר שטארק דאנקבאר אז הרב יונגרייז האט מיך אריינגענומען אין די שוהל זיך מיטצופרייען בשעת ער האט געטאנצט מיט די נייע ספר תורה.

מיר זעען דא בילדער פון אייך מיט הרב בענדער פון "ישיבה דרך התורה", וואס איז אייער פארבינדונג מיט אים?

איך האב געהאט די פּריוויליגיע זיך צו טרעפן מיט הרב בענדער, דורך זיין זון, הרב משה בענדער. ווען זיי האבן אפּגעקויפט און אנגעהויבן רענאווירן "קעמפּ אורייתא" אין וואודבוירן האט ער זיך געוואנדן צו מיר פאר הילף. מיר האבן זיך געטראפן און אויסגעארבעט א פּלאן, און יעדעס יאר האבן מיר געארבעט צוזאמען ווען זיי האבן רענאווירט און פארברייטערט זייער קעמפּ.

מיט א צייט צוריק בין איך איינגעלאדענט געווארן צו די ישיבה אין פאר-ראקאוועי זיך צו טרעפן מיט הרב בענדער, און איך בין שטאלץ אז זיי האבן אויסגעקליבן פאלסבורג פאר "קעמפּ אורייתא".

ס'איז נישט קיין סוד אז עס איז פארהאן א מאסיווע באוועגונג צו בויען נייע הייזער און דעוועלאפּמענטס אינעם טאון אוו פאלסבורג. אסאך מענטשן שיקן אריין פארלאנגן צו אייער אפיס זוכנדיג בילדינג פּערמיטס פאר שוהלן, קעמפּ'ס און דעוועלאפּמענטס. ווי אזוי טוט אייער אפיס רעאגירן צו די דאזיגע פארלאנגען?

מיר האבן נאכנאנאנד פארברייטערט אונזער בילדינג דעפּארטמענט נאכצוקומען די פארלאנגען, אבער ס'איז פארט נישט גענוג. אונזער טאון האט די גרעסטע בילדינג דעפּארטמענט אין די קאונטי, און מיר וואלטן צוגעלייגט נאך מאנשאפט, אבער ס'איז פארהאן א מאנגל אין פּאטענציאלע אינספּעקטארס. מיר פּרובירן צו באהאנדלען די פּערמיטן אויפ'ן שנעלסטן אופן, און מען קען דאס זען דורך די רעקארד צאל "סערטיפיקאטן אוו אקופּענסי" וואס מען האט ארויסגעגעבן זינט איך בין געווארן סופּערווייזער; טויזנטער "סי. או'ס", פיל מער ווי סיי וועלכע טאון אינעם קאונטי.

מיר ווילן זיך פארברייטערן, און איך האף צו קענען איינשליסן אינספּעקטארס פון צווישן די ארטאדאקסישע געמיינדע, וואס איך גלויב אז דאס וועט אויך פארבעסערן דעם אנזען פונעם דעפּארטמענט.

אונזער הויפּט זארג איז די זיכערהייט פון די וואס וועלן וואוינען אין די געביידעס, נישט פון די דעוועלאפּערס. מיר האבן געזען איינמאל און נאכאמאל, אז אונזער בילדינג דעפּארטמענט מוז פארזיכערן אז יעדע נייער איינוואוינער וועט קענען זיין רואיג און זיכער אינעם הויז וואס ווערט פאר אים געבויט. איך בין איבערצייגט אז ס'איז אונזער פליכט דאס צו ערמעגליכן.

ס'איז פארהאן נאך עפּעס וואס איר ווילט דערמאנען, וואס מיר האבן נישט אויפגעברענגט?

גייענדיג פאראויס אינעם וואל-סעזאן, וועלן אייערע לייענער מעגליך הערן נעגאטיווע זאכן איבער מיר... רוב, אויב נישט אלעס, וועט זיין פון אומאידענטיפיצירטע סאשעל-מידיא קוואלן. איך האב "געהערט" אז איך בין געווען קעגן דעוועלאפּמענטס... ס'קען נישט זיין עפּעס ווייטער פונעם אמת ווי דאס!

דא האט איר די ציפערן: זינט 10', זענען געבויט געווארן 1,688 פרישע רעזידענץ הייזער; מען האט ארויסגעגעבן איבער 2,200 "סי. עף. או".'ס; 1,029 הייזער ווערן איצט געבויט, און 1,404 הייזער זענען אין די פּלאנירונג שטאפּלען.

וואס מיר זענען, און וואס מיר וועלן זיין אזוי לאנג ווי איך בין דער סופּערווייזער, איז א טאון וואס פארלאנגט אז אלע געביידעס זאלן זיי פארזיכערט, אז זיי זאלן נאכקומען די בילדינג קאודס. מיר ערלויבן נישט אז די עווענטועלע איינוואוינער זאלן פאלן קרבנות צו פּראפיטן פון דעוועלאפּערס.

איך וויל פארשלאגן אז יעדער וואס האט סיי וועלכע פראגע איבער מיין יושר, אדער איבער סיי וועלכע פון מיינע שטעלונגען, זאל זיך דירעקט פארבינדן מיט מיר. איך וועל זיך טרעפן פּערזענליך אדער קאמיוניקירן מיט סיי ווער עס וויל מיט מיר רעדן.

כ'בין שטאלץ פון מיינע עררייכונגען, און איך קוק פאראויס צו קענען האבן א צוזאמענארבעט מיט יעדן ביים אנפירן א גרעסערן און בעסערן "טאון אוו פאלסבורג" אין די קומענדיגע יארן.