בס"ד

לייקוואוד. – א ריזיגע צאל ישיבה בחורים און יונגעלייט האבן זיך פארזאמלט דינסטאג אינדערפרי אין די 'בית מדרש גבוה' (BMG) ישיבה אין לייקוואוד פארן טראדיציאנאלן "חברותא טומל", גרייטנדיג זיך אנצוהייבן די סדרי הלימודים פארן נייעם זמן.

ווי מען קען זען אויף ווידעא קליפס וואס זענען פארשפרייט געווארן דורך 'די לייקוואוד סקופ', זעט מען א לעבעדיגע סצענע אינדרויסן פון די ישיבה, וואו מאסן תלמידים פילן אן דעם גאנצן שטח ארום די געביידע.

דער 'חברותא טומל' איז א באקאנטע און וויכטיגע טייל פונעם ישיבה לעבן אנהייב זמן, ווען די תלמידים זוכן זיך א פאסיגע חברותא מיט וועמען צו לערנען אינאיינעם דורכאויס די קומענדיגע חדשים.

די סצענע אין BMG האט אפגעשפיגלט די געוואלדיגע ענערגיע און קול תורה וואס נעמט ארום דעם אנהייב פון א נייעם זמן אין איינע פון די גרעסטע ישיבות אויף דער וועלט.