טראגעדיע אין ענגלאנד: א באזוכער איז טויטליך צוריסן געווארן דורך א טיגער אין א 'וויילדלייף פארק'

שבת נאכמיטאג ארום 1:30 איז די רואיגע אטמאספערע אינעם 'יארקשיר וויילדלייף פארק' נעבן דאנקאסטער, ענגלאנד, פארוואנדלט געווארן אין א שרעקליכע עמערדזשענסי סצענע. די לאקאלע פאליציי זאגט אז זיי האבן באקומען א רוף 1:35 אז א מאן איז אריינגעגאנגען אינעם צוים פונעם טיגער, און דער טיגער האט אים אטאקירט און אים פאראורזאכט קריטישע וואונדן. טראץ די שנעלע הילף פון די מעדיצינישע שטאב, האט מען אים ליידער געמוזט דערקלערן טויט אויפן ארט. די אמבולאנס סערוויס האט אהינגעשיקט צוויי אמבולאנסן, א העליקאפטער, און א דאקטאר צו ראטעווען זיין לעבן, אבער אן ערפאלג.

לויט ווי אויגנזעער דערציילן, האט דער מאן בלויז עטליכע מינוט בעפאר די טראגעדיע אויסגעזען צו זיין אין א גאר גוטע גיסטע. ער האט געטאנצן אויף א בריק מיט איערפאונס אין די אויערן, און האט געבעטן א צווייטן באזוכער אים צו כאפן א בילד מיט די גרויסע חיה אין די בעקגראונד. דער שארפער קאנטראסט צווישן די פרייליכע מינוטן און די שרעקליכע טראגעדיע וואס האט נאכגעפאלגט, האט איבערגעלאזט די באזוכער אין א טיפע שאק.

די פאליציי האט איבערגעגעבן אז דער טיגער, וועלכער רופט זיך 'אלטיי', איז נישט געשעדיגט געווארן, איז געבליבן אין זיין צוים, און האט נישט געשטעלט קיין סכנה פארן אלגעמיינעם פובליק. דער פארק האט באשטעטיגט אז מען גייט נישט הרג'נען דעם טיגער צוליב דעם אינצידענט. באלד נאכן פאסירן האט מען עוואקואירט דעם גאנצן פארק, און עס איז געבליבן פארמאכט דורכאויס דעם וויקענד און מאנטאג, בשעת אינוועסטיגעיטארס ארבעטן ארויסצוהאבן פונקטליך וואס דארט האט פאסירט.

די פאליציי האט שפעטער געמאלדן אז דער מאן איז געווען דארט אליינס. זיין נאמען איז נישט פובליצירט געווארן אויפן פארלאנג פון זיין פאמיליע, און די קעיס איז איבערגעגעבן געווארן צום לאקאלן קאראנער. די 'העלט און סעיפטי' אגענטור האט געמאלדן אז זיי גייען נישט אויספארשן דעם פאל, נאר די לאקאלע דאנקאסטער קאונסיל וועט איבערנעמען די אויספארשונג.

דערווייל בעט די פאליציי פונעם פובליק נישט צו טיילן די שוידערליכע ווידעא קליפס פונעם אינצידענט וואס צירקולירן אויפן אינטערנעט. די הויפט פראגע וואס פלאגט יעצט די אויספארשער איז: ווי אזוי האט א באזוכער באוויזן זיך אריינצובאקומען אינעם פארשלאסענעם צוים פונעם טיגער?