בס"ד

דראמאטישע ווידעא: אמעריקאנער מיליטער רייסט אויף קארטעל שיפלעך אינעם פאציפישן אקעאן

א פרישע ווידעא וואס איז ארויסגעגעבן געווארן דורך די 'יו. עס. סאדערן קאמאנד' (SOUTHCOM) צייגט דראמאטישע סצענעס ווי אמעריקאנער מארינען און מאטראסן פונעם 'יו-עס-עס סאן אנטאניא' קריגס-שיף גייען ארויף אויף פארדעכטיגטע קארטעל שיפלעך אינעם מזרח פאציפישן אקעאן און רייסן זיי אויף. אין די ווידעא זעט מען גרויסע פייער-קנוילן, רויך און שטיקער וואס פליען אין די לופטן פון די מעכטיגע אויפרייסן.

לויט די מיליטער, איז די אפעראציע פארגעקומען דעם 5'טן סעפטעמבער, ווען די קרעפטן האבן אטאקירט א פלאטע פון שיפלעך וואס האט געדינט ווי א שווימענדיגע 'ריפיולינג סטעישאן' (גאז סטאנציע) צו אנפילן די שנעלע שיפלעך פון די דראג שמוגלער אויפ'ן וואסער. די נעצווערק איז אנגעבליך פארבינדן צו די טרויעריג-בארימטע 'לאס טשאנעראס' גענג אין עקוואדאר. די אמעריקאנער קרעפטן האבן דורכגעזוכט די שיפלעך, און די מענטשן דערויף זענען איבערגעגעבן געווארן פאר די עקוואדארער אויטאריטעטן, בעת די הויפט שיף און די ארומיגע שיפלעך זענען געווארן געזינקען. די אפעראציע איז דורכגעפירט געווארן אין קאארדינאציע מיט עקוואדאר, מיט די הילף פון העליקאפטערס און קלענערע שיפלעך וואס זענען ארויסגעשיקט געווארן פונעם הויפט קריגס-שיף.

דאס איז בלויז איין טייל פון א ברייטערע רייע אפעראציעס אינעם ראיאן, אלס טייל פון די טראמפ אדמיניסטראציע'ס מאנאטן-לאנגע קאמפיין קעגן די קארטעל דראג-נעצווערקן, וואס האט שוין געפירט צו צענדליגע אטאקעס אינעם פאציפישן אקעאן און אינעם קאראבישן ים. עס איז מערקבאר א טויש אין די סטראטעגיע פונעם מיליטער: אנשטאט פשוט צו באמבארדירן די דראג שיפלעך ווי ביז יעצט, גייען יעצט די אמעריקאנער קרעפטן ארויף אויף די שיפלעך, זיי ארעסטירן די מאנשאפט, און ערשט דערנאך פארניכטן זיי די שיף. לויט SOUTHCOM איז דאס א טייל פון א ציל צו אינגאנצן צוברעכן די לאגיסטישע נעצווערק פון די שמוגלער.

אבער נישט יעדער איז צופרידן מיט די נייע טאקטיקן. קריטיקירער טענה'ן אז טייל פון די צילברעטער זענען גאר פשוט'ע עקוואדארער פישעריי שיפלעך. איין באריכט צייגט אפילו אז די געריכטן אין עקוואדאר האבן שוין ריינגעוואשן 32 ארעסטירטע מאטראסן פון סיי וועלכע קלאגעס. די הויפט פראגעס וואס בלייבן יעצט זענען, ווי שטארק די באווייזן זענען באמת, צי די נייע סטראטעגיע וועט טאקע אפשטעלן דעם פלוס פון דראגס, און ווי ווייט די קאמפיין וועט נאך גיין.