אומשולדיגע קאנטעינער אדער טויטליכע וואפן? נארוועגישע פירמע צייגט פרישע מיסיל סיסטעם באהאלטן אין א שיפינג קאנטעינער

די נארוועגישע דעפענס פירמע 'קאנגסבערג' האט אנטפלעקט א נייע מיליטערישע ערפינדונג אונטערן נאמען די 'NSM מישאן מאדול', וואס איז אין אנדערע ווערטער א סטאנדארטע 20-פוס שיפינג קאנטעינער וואס קען אנטהאלטן אין זיך ביז פיר שווערע 'נעיוועל סטרייק מיסילס'.

דער פראטאטייפ פונעם קאנטעינער איז געווארן אויסגעפרובירט דעם פארגאנגענעם אקטאבער 1, 2026, ביי א געהיימע מיליטערישע באזע אין נארוועגיע. ביי די פראבע האט מען גענוצט א פאלשע מיסיל וואס האט די זעלבע סייז און וואג ווי אן עכטע, אבער אן קיין אויפרייס מאטעריאל, צו זען וויאזוי דער קאנטעינער קען דערהייבן דעם דרוק און די קראפט פונעם שיסן.

דער סיסטעם ארבעט אויף אן אינטערעסאנטן אופן: דער דאך פונעם קאנטעינער עפנט זיך אויף, א לאנטשער קומט ארויס פון אינעווייניג און שיסט דעם מיסיל, און דערנאך ציט עס זיך צוריק אריין. פאר א מענטש פון אינדרויסן זעט עס אויס ווי א געווענליכע פשוט'ע קאנטעינער וואס מ'זעט טעגליך אויף די גאסן און פארטס.

דאס איז טאקע דער גאנצער ציל דערפון, ווי די פירמע ערקלערט, אז דער מאדול זאל קענען ארומפארן דורך סטאנדארטע שיפינג און טראנספארטאציע נעצן אן כאפן קיין אויג. מען קען עס ארויפשטעלן אויף שיפן, טראקס, אדער סיי וועלכע פלאץ אויף דער יבשה אן קיין שום ספעציעלע צוגרייטונגען. קאנגסבערג צילט צו פארקויפן דעם געדאנק פאר לענדער וואס פארמאגן לאנגע ברעגעס און גרויסע שטרעקעס צווישן מיליטערישע באזעס, וואו מען קען פאראויס אראפשטעלן די קאנטעינערס אויף א שטילע און באהאלטענע אופן.

דער באהאלטענער וואפן קען געבן א מעכטיגע קראפט פאר קאוסטעל דעפענס קרעפטן, אריינגערעכנט די מעגליכקייט צו שיסן אויף פיינטליכע שיפן אדער צילן אויף דער יבשה פון א ווייטע דיסטאנץ, אפילו פון פשוט'ע קאמערציאלע שיפן.

דערווייל איז דאס בלויז א פראטאטייפ וואס די פירמע האט אליינס פינאנצירט, און עס איז נאך נישט דא קיין באריכטן איבער סיי וועלכע קאנטראקטן מיט קויפער. עס בלייבן אויך עטלעכע פראגעס וואס דארפן נאך ווערן אויסגעקלארט, ווי צום ביישפיל ווי לאנג עס דויערט איבערצולאדן פרישע מיסילס, ווי שנעל מען קען טוישן די קאנטעינערס, און ווי גרינג עס איז אריינצובויען דעם סיסטעם אין עכטע קריגס-שיפן.