שמחה משולשת בתורה האבן זיך אלפי חסידי סקווירא מיטגעפריידט דעם מוצאי שבת ביים דרייפאכיגע חגיגה מעמד 'משולשת בתורה', סיומי מסכתות דורך חברת תורה ותפילה דחסידי סקווירא, און א מעמד חיזוק קביעות עיתים לתורה, אינאיינעם מיט די שבע ברכות פון חתן כלה אייניקלעך ביי כ"ק אדמו"ר מסקווירא שליט"א, ברוב פאר והדר לכבוד התורה ולומדיה. א רייכע סעודה איז געווען צוגעגרייט כיד המלך בהיכל ביהמ"ד הגדול, ווען בשעת מעשה איז אפגעהאלטן געווארן אן אינטערסאנטע פאנעל מיט עטליכע גבאים פון חברת תורה ותפילה אין שיכון סקווירא אינאיינעם מיט הרב יואל וויינבערגער הי"ו פון די עסקני קביעת עיתים אין קרית יואל, אויך איז פארגעקומען א הערליכע פרעזענטאציע בענין קביעות עיתים לתורה. ארום צען דרייסיג האט מען מקבל געווען פני קדשו פונעם רבי'ן שליט"א בשירה וזמרה, די רבי האט זיך געוואשן צום סעודה און טועם געווען פון די מאכלים לכבוד סעודתא דדוד מלכה משיחא, און לכבוד שמחת התורה און די שבע ברכות, די שמחה איז אויך באשיינט געווארן דורך האדמורי"ם מראחמיסטריווקא ספרינג וואלי, סקווירא מאנסי, בערגסאז, הגה"צ אבד"ק סאטמאר וויליאמסבורג, הגה"צ אבד"ק סאטמאר מאנסי און נאך חשובע רבנים. בנוכחותו פונעם רבי'ן שליט"א האט אויפגעטרעטן מיט די משא המעמד הרה"ג ר' משה יצחק אוסטערליץ ר"מ אין ישיבה גדולה און מגיד שיעור אין ביהמ"ד, און דערנאך האט גענימען דאס ווארט הרה"ח ר' יעקב יוסף שפיטצער יו"ר ארגון 'קדשינו' וועלכע האט איבעראשט דעם ציבור הנאספים און איינגעמאלדן אז בברכתו ועידודו פונעם רבי'ן שליט"א וועט געלאזט ווערן אין גאנג א ספעציעלע אייגנארטיגע פראגראם דורכאויס די ימי השובבי"ם וואו חסידי סקווירא אברכים בחורים און ילדי חמד וועלן מסיים זיין כל התורה כולה וואס רעכנט אריין תורה נביאים וכתובים, ש"ס בבלי און ירושלמי, טור בית יוסף, ספרי חסידות און מוסר, אלס א פאסיגע הכנה צום היסטארישן מעמד הכנסת ספר תורה דעם קומעדיגן פרשת תרומה, ביי וועלכן עס וועט אויך געפייערט ווערן די סיום כל התורה כולה. דערנאך איז פארגעקומען די סיומי מסכתות און סדרי הלימודים דורך הרה"צ רבי חיים מאיר שליט"א דעם רבינ'ס בן זקונים וועלכע לערנט פאר מדי יום ביומו די שיעורים אין דף היומי און ספרי חסידות בהיכל ביהמ"ד הגדול, מיט די התחלות איז מכובד געווארן הגאון רבי יוסף ישראל אייזנבערגער דומ"ץ שיכון סקווירא, און קדיש האט געזאגט די פטרון הסעודה הרבני הנגיד ר' יוסף מאשקאוויטש הי"ו פון סטעטן איילענד. דערנאך האט מען געזינגען ווארימע ניגוני הכנה און דער רבי שליט"א האט איבערגעגעבן א לענגערע שמועס אנגעהויבן מיט סיפורי קודש פונעם בעל ההילולא די זיידע הרה"ק רבי דוד'ל סקווירער זי"ע, און אויך פון די הייליגע מעזריטשער מגיד און די רבי ר' ברוך ממעזיבוזש זכותם יגן עלינו, דערנאך האט דער רבי ארומגערעדט איבער די דאפלטע שמחה, שמחת התורה ושמחת חתן וכלה, און אויך דערמאנט די זמן פון חודש כסליו וואס איז א פאסיגע זמן מסוגל מוסיף צו זיין בתורה, מוסיף והולך און מעלין בקודש.  צום שלוס האט דער רבי מאציל געווען מברכות קדשו לכל העם הנאספים, און מען האט זיך אויפגעשטעלט טאנצן פאר עטליכע מינוט בניגוני שמחה און ניגוני תורה, דערנאך זענען אלע מגידי שיעורים, עסקנים ונדבנים פון עמוד היומי און דף היומי דורך ביים רבי'ן שליט"א ערהאלטן א פערזענדליכע ברכת הקודש. מיטן בענטשן איז מכובד געווארן כ"ק אדמו"ר מבערגסאז שליט"א, ברכות ראשונות דעם רבינ'ס זון הרה"צ רבי יעקב יוסף טווערסקי, ברכה אחריתא די דיין הגאון רבי יוסף ישראל אייזנבערגער, דערנאך האט די גאנצע צוזאמען געוונטשן לחיים, די רבי האט זיך אויפגעשטעלט אויף א פריילעכע רקידה, און אום איינס אזייגער אויפדערנאכט האט מען אהיים באגלייט דעם רבי'ן בשירה וזמרה.

בילדער קרעדיט: ד. ה. כרם