דראמאטישע סצענעס פון תימן: כאוטי רעבעלן פארניכטן סאודי-געשטיצטע מיליטערישע טראקס אין די מדבר

א דראמאטישע ווידעא וואס צירקולירט יעצט פון תימן צייגט די שוידערליכע מאמענטן ווי כאוטי רעבעלן אטאקירן מיליטערישע טראקס אין די טיפע מדבר, שיקנדיג סאודי-געשטיצטע זעלנער פליען אין די לופטן צווישן מעכטיגע אויפרייסן און שווערע רויך.

אין די ווידעא קען מען זען ווי געפאנצערטע מיליטערישע טראקס ווערן איבערגעדרייט און גייען אויף אין פלאמען, בשעת די איבערלעבער פרובירן צו אנטלויפן און זוכן שוץ. באלד דערנאך זעט מען ווי די כאוטי קעמפער - באקאנט אלס 'אנסאר אללא' - רוקן זיך פאראויס צו די חרוב'ע און איבערגעלאזטע עקוויפמענט, און פארכאפן די טראקס וואס זענען איבערגעלאזט געווארן אין די כאאס.

די בילדער, וואס זענען פארעפנטליכט געווארן דורך די ארטיגע 'תימן קריגס מידיא', שטימען מיט די לעצטיגע באהויפטונגען פון די כאוטיס איבער סוקסעספולע אטאקעס אויף די סאודי-געשטיצטע קרעפטן אין די תימן'ער פראווינצן. די אפעראציעס זענען א טייל פון א ברייטערע קאמפיין פון מיסיל און דראון אטאקעס וואס די טעראר גרופע פירט דורך, וואס האבן אויך געצילט סאודישע לופטפעלדער און ענערגיע אינפראסטרוקטור. ביידע זייטן באריכטן כסדר איבער שווערע פארלוסטן און העפטיגע שלאכטן אין די מדבר זאנעס נעבן דעם ים סוף ברעג.

פון איר זייט איז סאודי אראביע נישט שולדיג געבליבן, און האט געענטפערט אויף די פארשטארקטע שלאכטן מיט שווערע לופט-אטאקעס אויף כאוטי פאזיציעס, אינאיינעם מיט'ן שטיצן די תימן'ער רעגירונג אין זייערע קאנטער-אפענסיוועס מיטן ציל צוריקצוכאפן קאנטראל אויף די פארלוירענע שטחים.

די כאוטי מידיא נוצט די סצענעס אלס א באווייז פון זייערע שנעלע פארשריט און דאס פארכאפן פיינטליכע געווער, בעת די סאודי-געשטיצטע קוואלן לייגן דעם טראפ אויף זייערע אייגענע סוקסעספולע אטאקעס און באמיאונגען צוריקצושטויסן די איראן-געשטיצטע קעמפער. די מדבר איז געווארן דער הויפט פראנט פאר די קאנפראנטאציעס, מיט פארברענטע און איבערגעלאזטע טראקס וואס צייכענען אפ די פראנט ליניעס.

די קאנפליקט אין תימן ווערט אלס מער פארבינדן מיט די ברייטערע אנגעצויגנקייט אינעם מיטל מזרח ראיאן, בשעת אינטערנאציאנאלע אבזערווירער האלטן ווייטער אן אויג אויף די באהויפטונגען פון ביידע זייטן אויפן שלאכטפעלד.