מדינת ישראל: הויפט עלעקשאן באאמטער קלארשטעלט אז חששות איבער אויסלענדישע פאנדינג וועט נישט טוישן די וואל רעזולטאטן

דער הויפט באאמטער איבער די וואלן אין מדינת ישראל האט קלארגעשטעלט אז די פארדאכטן איבער אויסלענדישע געלטער וואס זענען אריינגעפלאסן מיט'ן ציל צו באאיינפלוסן די וואלן פון פאריגע וואך, וועלן נישט טוישן די ענדגילטיגע רעזולטאטן.

ריכטער נעם סאלבערג, דער פארזיצער פונעם צענטראלן עלעקשאן קאמיטע, האט דאס געזאגט ביי א געמיינזאמע אויפטריט אינאיינעם מיט די אטוירני דזשענעראל גלי בהרב-מיארה און דער הויפט פונעם שטאטס-זיכערהייט אגענטור 'שב"כ', דוד זיני.

זיין מעסעדזש איז געווען גאר שארף און קלאר: "חששות זענען בלויז חששות, און צו קענען טשעלענדזשן עלעקשאן רעזולטאטן פעלט זיך אויס קראנטע באווייזן." ער האט צוגעלייגט אז אפילו אויב די פארדאכטן וועלן זיך ארויסשטעלן צו זיין אמת, וועט עס נישט שאטן צו די אמת'דיגקייט פונעם וואל פראצעס, און די אפיציעלע רעזולטאטן וועלן איבערגעגעבן ווערן צום פרעזידענט דעם קומענדיגן מיטוואך ווי געפלאנט.

דער שב"כ פירט אן א שטילע אויספארשונג איבער די באשולדיגונגען, און די זאך איז געווארן פובליק נאכדעם וואס סאלבערג האט געשיקט א בריוו צו זיני בעטנדיג ער זאל אריינקוקן דערין. סאלבערג האט אונטערגעשטראכן אז די אויספארשונג האט בשום אופן נישט קיין ציל צו ווארפן א שאטן אויף די שטימען פונעם אראבישן סעקטאר, און ער האט בארואיגט די וויילער אז זייערע שטימען זענען געציילט געווארן און זייער באשלוס וועט רעספעקטירט ווערן.

זיין שטעלונג איז אבער נישט אדורך אן קיין קריטיק. די ליכוד פארטיי האט שארף פארדאמט זיין סטעיטמענט אז די רעזולטאטן וועלן בלייבן אין קראפט אפילו אויב די באשולדיגונגען וועלן איבערגעוויזן ווערן.

דערווייל בלייבן נאך גרויסע פראגעס אומגעענטפערט, אריינגערעכנט ווער די אויסלענדישע שפילער זענען וואס האבן פרובירט זיך צו מישן, וויפיל געלט איז געווען פארמישט, און וואס דער שב"כ וועט צום סוף אויסגעפינען.