דראמאטישע סצענעס אויף א פלייט קיין ארץ ישראל: פאסאזשירן באוועלטיגן טעראריסטן וואס האבן פרובירט צו פארכאפן דעם עראפלאן

דראמאטישע ווידעא רעקארדירונגען פון אינעווייניג אין א 'פליידובאי' (Flydubai) פלייט צייגן די שרעקעדיגע מינוטן נאכדעם וואס פאסאזשירן האבן זיך העפטיג געשלאגן און באוועלטיגט א גרופע אטאקירער בעת א געוואלדטאטן אינצידענט הויך אין די לופטן.

אינעם ווידעא קען מען זען א פאסאזשיר, באדעקט מיט בלוט אויף זיין פנים און קליידער, ווי ער שרייט אויס פאר הילף: "מיר האבן איבערגענומען קאנטראל אויף די טעראריסטן. ווער עס קען מיר הערן, מיר ברויכן הילף!" די רעקארדירונג איז געכאפט געווארן בשעת דער עראפלאן, וואס איז געווען אויפ'ן וועג פון דובאי קיין תל אביב, האט זיך געגרייט פאר אן עמערדזשענסי לאנדונג.

פאסאזשירן האבן שילדערט א כאאטישע געראנגל וואס האט זיך אנגעהויבן נעבן דעם קאקפיט, ווען עטליכע מענטשן זענען פאראויסגעלאפן צו אפהאלטן די אטאקירער און באשיצן דעם פלייט דעק. דער עראפלאן האט ארויסגעשיקט עמערדזשענסי סיגנאלן, אריינגערעכנט א קאוד וואס צייגט אויף א מעגליכע היידזשעקינג אדער אומלעגאלע אריינמישונג, בעפאר ער האט זיך פארדרייט פון זיין ארגינעלן רוט.

מדינת ישראל באאמטע האבן שפעטער אפגעשאצט דעם אינצידענט אלס א מעגליכע טעראר אטאקע מיטן ציל צו קראכן דעם דזשעט. דער עראפלאן האט ברוך השם געלאנדעט אומגעשעדיגט אינעם טאבוק עירפארט אין צפון-מערב סאודי אראביע, וואו עמערדזשענסי רעספאנדערס האבן אפגעווארט דעם פלייט. ביידע פילאטן זענען פארוואונדעט געווארן און זענען אפגעפירט געווארן אין שפיטאל. 'אף-דוטי' קרו מיטגלידער וואס זענען געפארן אלס פאסאזשירן האבן ארויסגעהאלפן צו סטאביליזירן די סיטואציע און אראפברענגען דעם עראפלאן בשלום נאכן געפעכט.

ווידעאס וואס צירקולירן פון אינעווייניג אינעם קאבין ווייזן ווי פאסאזשירן שטייען וואך נעבן דעם קאקפיט און באהאנדלען די פארוואונדעטע, בשעת זיי באשטעטיגן כסדר אז די געפאר איז נייטראליזירט געווארן. די עירליין 'פליידובאי' האט באשטעטיגט אז אן אינצידענט איז פארגעקומען אינמיטן וועג און אז אלע פאסאזשירן זענען געפונען געווארן געזונט און פריש נאכן לאנדן.

דער שרעקעדיגער עפיזאד האט געפירט צו דרינגענדע זיכערהייט איבערזיכטן און האט אויפגעברענגט ערנסטע פראגעס איבער די צוטריט צום קאקפיט און די סקרינינג פון קרו מיטגלידער אויף אינטערנאציאנאלע רוטס. אינוועסטיגעיטארס פארשן ווייטער אויס די קייט פון געשעענישן וואס האט געפירט צו די דראמאטישע עמערדזשענסי לאנדונג און די העלדישע אריינמישונג פון די פאסאזשירן.