עקסטאז און געהויבענע פרייד הערשט אינערהאלב ברייטע מאסן פון אלע חסיד'ישע קרייזן, מיט די מעלדונג איבער דעם נארוואס פארענדיגטן איבערבוי און ווידער-אויפבּלי פונעם הייליגן בית המדרש נועם אלימלך אין ליזענסק נאך 83 יאר וואס ס'איז געשטאנען חרוב ונחרב דורך נאצישע רשעים ימ"ש ביים צווייטן וועלטס-קריג, וועלכע איז צושטאנד געקומען דורך די אומערמידליכע ארבעט פון הרה"צ רבי דניאל רוקח שליט"א האדמו"ר מליזענסק.

בלויז צו דערמאנען דאס בית המדרש וביתו נאוה קודש פונעם הייליגן רבי'ן רבי אלימלך זי"ע, כאפט א ציטער ביי שלומי אמוני ישראל וועלכע באציען זיך דערצו ווי דער 'קדשי קדשים' בעולם החסידות. אין דעם ארט איז פארגעקומען זיין הימל'דיגע עבודת הקודש וואס האט אויפגערייסעלט אלע צדיקי קדמאי שרפי מעלה מדור דור. נאך זיין פטירה האבן דארט משמש געווען באדמורו"ת די ממשיכי שלשלת הקודש, אנגעהויבן פון בנו הק' ממלא מקומו הרה"ק הרבי ר' אלעזר, בנו הרה"ק רבי נפתלי, בנו הרה"ק רבי אלעזר, בנו הרה"ק רבי אלימלך, בנו הרה"ק רבי אלחנן זי"ע לבית וייסבלום. ביי זיי איז געלעגען דער שליסל פונעם הייליגן אוהל, און דארט זענען זיי נטמן געווארן לאחר פטירתם.

דער לעצטער רבי פון די שלשלת פארן קריג, איז געווען כ"ק האדמו"ר רבי אברהם יהושע העשיל רוקח מליזענסק זצוק"ל דער איידים און ממלא מקומו פון הרה"ק רבי אלחנן מליזענסק זי"ע. אין יאר תרצ"ט זענען די רשעים ימ"ש אריין קיין ליזענסק און פארטריבן אלע אידישע איינוואוינער קיין סיביר, ובתוכם דער ליזענסקער רבי זצ"ל. נאך 6 יאר פון גלות סיביר איז דער רבי זצ"ל אנגעקומען מיט זיין משפחה קיין ברוקלין, ווי ער איז צוריק באוואוסט געווארן ווי דער ליזענסקער רבי און ארגינעלע ממשיך פונען שלשלת הקודש. אין יאר תש"ם איז דער רבי נסתלק געווארן און נטמן געווארן אויף הר המנוחות אין ירושלים,סמוך ונראה צום ציון הק' פון ש"ב כ"ק מרן אדמו"ר מהר"א מבעלזא זצוק"ל. 

אדמו"ר שליט"א - נכדו וממלא מקומו וועלכער שטייט בראש מוסדות ליזענסק בארה"ב האט לעצטענס אפּגעקויפט דעם פארלאזטן בנין אין ליזענסק, און אריינגעלייגט פיל ארבעט און געלט, עס איבערצובויען און אהערשטעלן מיט א בית המדרש, היכל התורה, און הכנסת  אורחים מיט אש"ל, וואס זאל דינען ווי א צענטער פון תורה עבודה וגמ"ח ע"ש אבותיו הק' צדיקי בית ליזענסק, ווי ס'פּאסט פאר אזא מקום קדוש.

דעם פארגאנגענעם יומא דהילולא כ"א אדר א' האבן מאסן אידן ווידער זוכה געווען פוקד צו זיין דעם ציון הק', נאך 2 יאר וואס די גרעניצן זענען געווען פארמאכט צוליב די וועלטס וויירוס-אנשטעקונג ל"ע, און געזעהן פון דער נאנט דעם גראנדיעזן פּראיעקט וועלכע איר וויכטיגקייט שפּירט זיך שוין לאנג. צווישן די פילע מאסן האט זיך כסדר געהערט א וואונטש,"הלואי וואלט געווען א פאסיגע מקום צו קענען עוסק זיין בתורה ותפלה מתוך מנוחה, סמוך ונראה צום ציון הק'!"  

איצט ביו"ד כ"א אדר ב' הבעל"ט, וועט אי"ה פארקומען א פייערליכע גראנדיעזע חנוכת הבית בראשות האדמו"ר מליזענסק שליט"א, בהשתתפות אדמורי"ם, רבנים, און רבבות אלפי ישראל, חסידים ואנשי מעשה מוקירי המשכת מורשת שלשלת צדיקי בית ליזענסק, עד ביאת גואל צדק בב"א.