היסטארישע אויספארשונג: 9 פון די גרעסטע אמעריקאנער יוניווערסיטיס אונטער אן אינוועסטיגעישאן פאר 'וויזע פראד'

דער אינספעקטאר דזשענעראל פונעם לעיבאר דעפארטמענט, ענטאני די'עספאזיטא, האט די וואך אראפגעווארפן א באמבע ווען ער האט געמאלדן אן היסטארישע אויספארשונג איבער אנגעבליכע "J-1 וויזע פראד" ביי ניין פון די גרעסטע און מערסט פרעסטיזשפולע אמעריקאנער יוניווערסיטיס. די שולעס וואס זענען אונטער די אויספארשונג רעכנט אריין: פיטסבורג, יעיל, הארווארד, סטענפארד, בראון, יו-סי דעיוויס, קעלטעק, אריזאנע סטעיט, און עמ-איי-טי (MIT).

די'עספאזיטא האט דערקלערט אז מ'האט שוין ארויסגעשיקט סובפינעס פאר די שולעס, און די אינוועסטיגעישאן איז שוין אין פולן שוואונג. די הויפט פראבלעם איז אז די יוניווערסיטיס האבן אנגעבליך אויסגענוצט די J-1 וויזע פראגראם — וואס איז אריגינעל געמאכט פאר קולטוראלע און עדיוקעישאנאל עקסטשעינדזש — אריינצוברענגען אויסלענדישע ריסערטשערס און סטודענטן פאר ביליגערע פרייזן. דאס טוט אונטערברענגען די געהאלטן פון אמעריקאנער ארבייטער וואס טוען די זעלבע ארבעט, וואס ווערט פינאנצירט דורך די פעדעראלע רעגירונג.

באאמטע ווייזן אן אויף דאטא וואס צייגט אז א מאיאריטעט פון די ריסערטשערס אין די אינסטיטוציעס קומען פון אויסלאנד, וואס ברענגט ארויף ערנסטע פראגעס צי די שטייער-צאלערס געלטער ווערן גענוצט ווי געהעריג. ביי א פרעסע קאנפערענץ האט די'עספאזיטא קלארגעמאכט אז קיין איין יוניווערסיטי וועט נישט באקומען קיין ספעציעלע באהאנדלונג, אפגעזען ווי פרעסטיזשפול אדער רייך זיי זענען. ער האט געזאגט אז מ'גייט גרונטליך אונטערזוכן צי די שולעס האבן סיסטעמאטיש אביוזד דעם פראגראם פשוט צו באקומען ביליגע ארבעטסקראפט.

די אויספארשונג טראגט א גרויסע וואג, נאכדעם וואס אינוועסטיגעיטארס האבן אנגעוויזן אויף ביישפילן וואו די חילוק אין געהאלט צווישן אן אויסלענדישן און אן אמעריקאנער ארבייטער וואס טוען די פונקטליכע זעלבע ארבעט קען גרייכן ביז צענדליגע טויזנטער דאלארן. דער לעיבאר דעפארטמענט האט ספעציעל צוזאמגעשטעלט א "וויזע פראד סטרייק טיעם" וואס וועט זיך אריינגראבן אין די רעקארדס, פאנדינג, און הייערינג פראצעדורן פון די דערמאנטע שולעס.

אויסער די געהאלט אישו, וועט די אינוועסטיגעישאן אויך אריינקוקן אין מעגליכע נאציאנאלע זיכערהייט ריזיקעס, צוליב די מורא פון אויסלענדישע איינפלוס אויף סענסיטיווע ריסערטש. די יוניווערסיטיס דארפן זיך יעצט ספראווען מיט אן ערנסטע פעדעראלע אויספארשונג, וואס קען פירן צו שטרענגע קאנסעקווענצן אויב מ'געפינט אז זיי האבן טאקע פארלעצט די געזעצן, און דאס איז א טייל פון א ברייטערע קאמפיין פון די גאווערנמענט צו באשיצן אמעריקאנער דזשאבס און פארשטערקערן די קאנטראל אויף וויזע פראגראמען.