א געהויבענע ערשטמאליגע שבת געפראוועט געווארן אין קאלוב
א געהויבענע ערשטמאליגע שבת געפראוועט געווארן אין קאלוב
אין אן ערשטמאליגע ערשיינונג נאך די צווייטע וועלט קריג, איז געפראוועט געווארן א געהויבענע שבת אין די הייליגע שטאט קאלוב, דורך א קבוצה חסידי קאלוב בראשות הרה"צ רבי ישכר דוב טויב שליט"א אבד"ק קאלוב וויליאמסבורג, וועלכע זענען געקומען צו פארן לקראת די יומא דהילולא קדישא ז' אדר וואס איז געפאלן מוצאי שבת.
די שבת איז ערמעגליכט געווארן אדאנק א נייע האטעל וואס איז נארוואס געבויט געווארן אין קאלוב, וואס דאס גיבט צום ערשטן מאל די געלעגנהייט פאר א געהעריגע קבוצה צו נעכטיגען אינעם הייליגען שטעטל, נאכדעם וואס מען האט דארט צוגעשטעלט אלע צוגעהערן, אריינגערעכענט וואסער וואו קען מען זיך טובל'ן.
די תפלות און סעודות שבת קודש זענען אפגעראכטן געווארן ברוב דביקות וגעגועים, אויפן נוסח פונעם בעל ההילולא דער הייליגער קאלובער זי"ע, דער מרא דאתרא קדישא קאלוב וואס צדיקים האבן מעיד געווען אז עטליכע פרסאות ארום די שטאט שפירט מען שוין די רושם דקדושה וואס דער צדיק האט איבערגעלאזט אויף דעם מקום. ווי אויך זענען געהערט געווארן ווארימע שמועסן במשנתו פונעם בעל ההילולא, דורך נכדו דער קאלובער רב שליט"א.
ספעציעל האט צוגעגעבן צום געהויבענקייט פון די תפלות און סעודות, די פאקט אז עס איז געפראוועט געווארן סמוך ונראה צום ציון הקדוש די תל תלפיות וואו טויזענטע אידן האבן שוין געפועלט ישועות, צווישן די ווענט פון די נייע בנין הכנסת אורחים וואס איז ממש קעגן איבער די ציון וואס מען קען זעהן פון די פענסטער, וואס איז נתנדב געווארן דורך הנדיב הנכבד ר' אברהם בראך הי"ו נכד הצדיק רבי יעקב פיש זצ"ל פרנס עיר קאלוב וועלכער האט געשטעלט דער הייליגער קאלובער זי"ע אלס רב אין קאלוב.
גאר ספעציעל זענען געווען די געהויבענע געפיהלן בשעת תפלת קבלת שבת, וואס מען האט געדאווענט אויפן מקום קדוש פונעם הייליגן בית המדרש פון דער הייליגער קאלובער זי"ע, וואס גדולי הצדיקים הקודמים פלעגן מדקדק זיין צו דאווענען דארט איין תפלה ווען זיי זענען געווען אין קאלוב, זאגענדיג אז עס הערשט דארט א ספעציעלע קדושה. רוב פון די בנין הבית המדרש איז חרוב געווארן ביים קריג, אבער די אונטערשטע חלק פון די פיר הייליגע ווענט זענען געליבן שטיין עד היום הזה. מה נורא המקום הזה, וזה שער השמים.
מוצאי שבת קודש, בעצם יומא דהילולא קדישא, איז מען אריין אין די באקאנטע הייליגע מערה וואו עס איז מקום מנוחת הקודש, וואו מען האט איינגעריסן בתפלה לישועת הכלל והפרט ברוחניות ובגשמיות, ובפרט פאר די בריאות פון נכדו ממשיך דרכו בקודש כ"ק אדמו"ר מקאלוב שליט"א רבינו משה בן ריזל לרפו"ש, און פאר די שמירה עליונה פאר אחינו בני ישראל בארץ הקודש ובכל תפוצות ישראל.
גאלערי