בס"ד

דראמא אינמיטן די לופטן: פאסאזשיר פרובירט זיך איינברעכן אינעם קאקפיט אויף אן 'ארקיע' פליגער

א שרעקעדיגע אינצידענט האט זיך אפגעשפילט אינמיטן א פליגער רייזע, ווען א פאסאזשיר אין זיינע צוואנציגער יארן האט פרובירט מיט געוואלד זיך אריינברעכן אינעם קאקפיט פון אן 'ארקיע' פליגער וואס איז געווען אויפן וועג פון טביליסי, דזשארדזשיע, קיין בן גוריון עירפארט, און אנגעמאכט א גרויסע איבערקערעניש.

לויט די באריכטן, ארום א שעה נאכן זיך הייבן, האט דער פאסאזשיר פלוצלינג אנגעהויבן ווילד שרייען און קלאפן אויף די טיר פונעם קאקפיט. די פליגער מאנשאפט צוזאמען מיט אנדערע פאסאזשירן זענען שנעל אריינגעשפרונגען אין בילד און עס איז זיי געלונגען אים צו בארואיגן און אים אראפהאלטן.

באלד נאכדעם וואס דער פליגער האט זיכער געלאנדעט אין עירפארט, האט די פאליציי אפגעווארט דעם פאסאזשיר און אים גענומען פאר אן אויספארשונג.

די 'ארקיע' עירליין האט באשטעטיגט דעם אינצידענט, ארויסברענגענדיג אז די סיטואציע איז שנעל געברענגט געווארן אונטער קאנטראל און די זיכערהייט פונעם פליגער און אירע פאסאזשירן איז אין קיין שום פונקט נישט געווען אין געפאר.