היסטארישע 'מעמד היסוד' אין סטעטן איילענד צום עפענונג פון די ערשטע חסידישע תלמוד תורה אין שטאט: תלמוד תורה צאנז

די תלמוד תורה ווערט געגרינדעט אונטער די פירערשאפט פון הרה"ג רבי אהרן הלברשטאם שליט"א מנהל ת"ת 'דרכי חיים' אין בארא פארק

קרוב צו זעכציג עלטערן זענען זיך צוזאמגעקומען פארלאפענע מאנטאג פרשת קרח אין די אווענט שטונדן צום הערליכן 'מעמד היסוד' וואס איז אפגעהאלטן געווארן אין די בנין התלמוד תורה פון די ניי-געגרינדעטע תלמוד תורה צאנז אין סטעטן איילענד, וואו זיי האבן געהערט יסודות החינוך פון גדולי המחנכים שליט"א.

דער פלאן צו עפענען א חסידישע תלמוד תורה אין סטעטן איילענד האט זיך אנגעהויבן שוין אנהייב יאר, ווען די ציפער פון חסידישע פאמיליעס אין שטאט האלט שוין קרוב צו פינף הונדערט כ"י, און דער געברויך איז געוואקסן כסדר.

ביז איצט שיקן אלע עלטערן אריין די קינדער אין די מוסדות החינוך אין בארא פארק, ווען העכער פופצן באסעס אנגעפילט מיט העכער טויזנט זיסע לעכטיגע קינדערליך קורסירן טעגליך איבער די גאסן פון שטאט און נעמען אויף די קינדער, און טראגן זיי אריין אין בארא פארק, וואו זיי לערנען, מערסטענס אין די זעלבע מוסדות וואו זיי האבן געלערנט איידער די פאמיליע האט זיך געצויגן קיין סטעטן איילענד, אריבער דעם ווערעזאנאו בריק, וואס איז ארום 20 מינוט פון ברוקלין.

ווי א יאר איז פארביי, איז מער און מער אריין די רעאליטעט ביי די איינוואוינער אין סטעטן איילענד אז עס איז שוין העכסט צייט אז עס זאל זיך עפענען א חסידישע חדר אין שטאט, וואס זאל דינען אלס מוסד וואו מען איז מחנך די קינדער אויף די זעלבע סטאנדארטן וואס די מוסדות אין ברוקלין פארמאגן, אין די זעלבע צייט וואס מען קען זיך שפארן דאס אריינפירן די קינדער קיין ברוקלין, וואס טראץ דעם וואס די וועג איז נישט אזוי לאנג, איז עס אבער נאך אלץ א היבשער שלעפ.

אנהייב יאר האבן עטליכע עלטערן זיך געוואנדן צו הגה"צ רבי אהרן הלברשטאם שליט"א, וועלכער דינט שוין לאנגע יארן אלס דער מנהל רוחני פון דער בארימטער תלמוד תורה 'דרכי חיים' אין בארא פארק, וואס האט זיך ערווארבן א נאמען פון אן אויסגעצייכנטער מוסד אין אלע הינזיכטן, אז עס וואלט געווען א געוואלדיגע תועלת פאר די שטאט אויב מען קען עפענען אזא סארט חדר אין סטעטן איילענד.

נאכן זיך באראטן מיט גדולי ישראל, און מיט זייער גוטהייסונג און ברכה אויף ווייטער, איז דער מייסד המוסד שליט"א מיט די הילף פון עסקני העיר, אריינגעשפרינגען אין דעם גראנדיעזן פראיעקט. פארלאפענע חודש טבת העעל"ט האט מען אנאנסירט דער גרינדונג פון דער מוסד, און מען האט אנגעהויבן צו נעמען אפליקאציעס פון די עלטערן וואס זענען אינטרעסירט צו שיקן זייערע קינדער אין די מוסד.

אין די זעלבע צייט האבן די עסקנים און די ניי-געגרינדעטע וועד ההורים פון די מוסד זיך אריינגעלייגט ראשם ורובם צו קענען טרעפן א פאסיגער ארט וואס זאל דינען אלס דער לאקאל וואו מען וועט עפענען די תלמוד תורה, און ב"ה עס איז געלונגען צו געפינען גאר א פאסיגער און גרויסער געביידע הארט אינדרויסן פון די אידישע געגענט, וואס איז גאר צוגעפאסט פאר א אידישע מוסד אין אלע הינזיכטן, און מען דארף ניטאמאל צופיל ארבעט עס צו קענען אנגרייטן פארן חדר אויסער די מינימאלע קאנסטראקשאן וואס פעלט זיך אויס אויפצופרישן די געביידע עס צו אנגרייטן פאר די קומענדיגע שולע-יאר ווען די מוסד וועט זיך עפענען בעזרת ה'.

גלייכצייטיג האבן די עלטערן אריינגעשיקט אפליקאציעס פאר די הנהלת התלמוד תורה, און עס האט זיך שנעל ארויסגעשטעלט א קלארע בילד פון די געוואלדיגע געברויך פאר אזא מוסד, ווען מען האט שוין אין אנהייב געזען אז מען האט גענוג קינדער צו עפענען עטליכע קלאסן.

נאכן זיך טרעפן מיט די עלטערן און מען האט שוין געהאט אן ערנסטע ציבור עלטערן וואס שיקן די קינדער, האט דער מייסד המוסד שליט"א געמאלדן אז ער וויל פאררופן א 'מעמד היסוד' וואו מען וועט זיך קענען טרעפן אינאיינעם, די עלטערן מיט די הנהלת המוסד, וואו מען וועט ארומרעדן און ארויסברענגען די וויכטיגע יסודות וואס אויף זיי וועט מען בעז"ה עפענען דעם מוסד.

די פרעכטיגער מעמד איז פארגעקומען פארלאפענע מאנטאג פרשת קרח אין די אווענט שטונדען, ווען די עלטערן פון די קינדער פון די מוסד זענען געקומען צום געביידע וואו די מוסד ווערט געעפנט. זיי האבן זיך נישט געקענט גענוג אפזעטיגן פון די הערליכע געביידע וואס שטייט שוין כמעט גרייט פאר די עפענונג פון די מוסד, און גלייכצייטיג געקוואלן א רוחניות'דיגע קורת רוח פון עטליכע שעה גייסטרייכע דרשות פון בארימטע בעלי דרשנים און אויסגערופענע מחנכים.

דער אווענט איז איינגעלייטעט געווארן דורך הרב ישראל שפירא שליט"א, א בארימטער מחנך אין ברוקלין און תושב העיר, וועלכער האט זעלבסט א קינד אינעם מוסד, און האט געדינט אלס דער יושב ראש פונעם מעמד. ער האט מיט קורצע ווערטער אויפגענומען די פארזאמעלטע, און אויפגערופן הרה"ג ר' מרדכי ווייס שליט"א צו זאגן דברי פתיחה.

הרב ווייס שליט"א, וועלכער דינט שוין לאנגע יארן אלס מחנך און מנהל פאר בחורי חמד, האט דערציילט פאר די פארזאמעלט אביסל מער דעטאלן פון 'אונטער די קוליסן' וואס האט זיך אפגעשפילט די לעצטערע חדשים, און ווי שטארק די גדולי ישראל האבן געשטופט דעם מייסד המוסד שליט"א ער זאל נעמען דעם גרויסן עול אויף זיך, און די סייעתא דשמיא וועט אים זיכער באגלייטן אויף טריט און שריט, און ב"ה מען האלט שוין דא, ווען יעדער קען אליינס זעהן אז פון הימל העלפט מען צו אזא גראנדיעזען פראיעקט.

דאן האט דער יושב ראש אויפגערופן הרה"ג ר' חיים מאיר שטיינמעטץ שליט"א, וועלכער דינט אלס מלמד אין תלמוד תורה דרכי חיים אין ברוקלין, תחת דגלו פון דער מייסד המוסד שליט"א, און האט ארויסגעברענגט גאר וויכטיגע נקודות פאר עלטערן וויאזוי די סדר גייט צו אין אזא חסידישע חדר, און וואס זענען די דרינגענדע נקודות וואס געפאדערט פון אלע מלמדים דורך דער מייסד המוסד שליט"א, און וועט זיין די הויכפונקטן ווען עס קומט צו אנהייבן דעם נייעם חדר.

דער יושב ראש האט דאן אויסגערופן הר"ר יחזקאל קליין שליט"א, וועלכער איז באשטימט געווארן צו פארפיגן איבער די 'חינוך מיוחד' אפטיילונג פון דער מוסד. הרב קליין שליט"א האט מיט קורצע ווערטער ארויסגעברענגט די וויכטיגקייט און ריכטיגע ארט וואס דער ענין דארף צו האבן ביי עלטערן און וויאזוי די הנהלת המוסד נעמט דער ענין מיט די פולסטע מאס ערנסטקייט.

דאן האט אויפגעטרעטן דער נשיא המוסד, הרה"ג רבי אהרן הלברשטאם שליט"א, וועלכער האט מיט זיין לשון לימודים פארגעשטעלט דעם טאן פון דער מוסד, און די יסודות אויף וואס זי ווערט געגרינדעט. צווישן אנדערס האט ער ארויסגעהויבן דער הייליגער נאמען וואס ער האט געגעבן פארן תלמוד תורה: "צאנז", דער נאמען וואס ברענגט אן חרדת קודש ביי יעדער חסידישער איד. ער האט צוגעלייגט די געוואלדיגע השפעה וואס דער הייליגער צאנזער רב האט געהאט בשעתו ולדורות, דערציילענדיג וואס ער האט געהערט יארן צוריק פון א צאנז אפשטאמיגער, וועלכער האט דערציילט ווי ער געדענקט אז פארן קריג, ווען דאס אידישקייט האט שוין ליידער געליטן פון די אלע מינים שונים וואס האבן געשלעפט פון אלע זייטן און געריסן שטיקער פון די יוגענט, און צאנז איז דאן ארויסגעשטאנען ווען אין די גאנצע גלילות איז נישט געווען קיין איין מחלל שבת בפרהסיא, א חידוש אין יענע צייטן.

צום לעצט האט דער יושב ראש אויסגערופן דער בארימטער משפיע הגה"צ רבי יצחק אייזיק קרישעווסקי שליט"א, וועלכער האט עלעקטרעזירט די פארזאמעלטע מיט זיינע פייערדיגע רייד. ער האט צווישן אנדערע, שטארק ארויסגעהויבן דער פאקט, אז דאס שיקן א קינד צו א חסידישע מוסד דארף דינען ווי א מחייב פאר די עלטערן, אז די שטוב זאל זיין צוגעפאסט צו די יסודות וואס מען פלאנצט איין אין די קינדער אין חדר, אזוי אז עס זאל נישט זיין ח"ו קיין סתירה צווישן זיי.

די פארזאמעלטע זענען געזעצן צוגענאגלט צו די ערטער פאר א לענגערע צייט, שלונגענדיג מיט דורשט די וויכטיגע רייד פון די חשובע בעלי דרשנים. און דערנאך האט מען אביסל פארברענגט אינאיינעם בשבת אחים גם יחד, ווען אלע זענען צוזאמען דאהי מיטן זעלבן ציל צו קענען ממשיך זיין די מסורת אבות און איינבאקן אין די קינדער א חינוך וואס וועט דינען פאר זיי ווי א לייכטורעם אויף זייער גאנץ לעבן.

די הנהלת המוסד האט זיך אויסגעדרוקט מיט גרויס צופרידענהייט נאך דעם אסיפה, מען האט באשיינפערליך געשפירט די 'כינוס לצדיקים נאה להם ונאה לעולם', וואס האט אן המשכה און א קיום אויף ווייטער. בשעת מיר גייען צום דרוק קומט אריין די פריידיגע נייעס אז מען האט שוין ב"ה אויפגענומען א מנהל, הרה"ג רבי יואל מייזליש שליט"א, אן אייניקל פון הגה"ק מווייטצען זצ"ל, וועלכער וועט שטיין אין שפיץ פון די טעגליכע ארבעט אין די חדר, תחת דגלו של נשיא המוסד שליט"א.

עס איז אנגעמערקט געווארן אן אינטרעסאנטע אנעקדאט, אז דער געגענט 'פארט ריטשמאנד' וואו עס געפינט זיך די געביידע פון די תלמוד תורה, איז פאר הונדערט יאר צוריק געווען די אידישע געגענט פון סטעטן איילענד, לאנג איידער מען האט זיך געצויגן קיין 'ווילאוברוק', וואס האט זיך אנגעהויבן אין די תש"י און תש"כ יארן, נאכן אויפבוי פון די 'ווערעזאנאו' בריק. ליידער, במשך די דורות זענען די אלע שולן און מקוואות פון יענע געגענט אונטערגעגאנגען, און די געביידע פון די תלמוד תורה איז פון די לעצטע צוויי געביידעס וואס געפינט זיך נאך אין אידישע הענט, און יעצט איז צום האפן אז די קול התורה וועט זיך נאכאמאל הערן אין די גאסן פון יענעם ווינקל אין סטעטן איילענד.

ורוח הקודש אומרת כן ירבה וכן יפרוץ