ארץ ישראל: ישיבה בחור ארעסטירט אויפ'ן וועג אהיים אויף שבת צוליב גיוס

א ישיבה בחור איז ארעסטירט געווארן דעם פארגאנגענעם פרייטאג אין ארץ ישראל, בעת ער איז געווען אויפ'ן וועג אהיים צו זיין משפחה אויף שבת, נאכדעם וואס די פאליציי האט אנטדעקט אז ער ווערט געזוכט דורך די מיליטערישע אינסטאנצן איבער זיין גיוס סטאטוס.

דער בחור, א תלמיד אין ישיבת 'רוממות הלב' אין גבעת זאב, איז אפגעשטעלט געווארן דורך די פאליציי אויף רוט 3 נעבן מושב בקוע. נאכ'ן אים אידענטיפיצירן, איז ער תיכף איבערגעגעבן געווארן אין די הענט פון די מיליטערישע פאליציי.

לויט באריכטן אין די ארטיגע חרדי'שע נייעס קוועלער, איז געווען ערווארטעט אז ארום 35 בני תורה זאלן פארברענגען דעם שבת אין מיליטערישע טורמעס, אין שאטן פון די אנגייענדע כוואליע פון ארעסטן קעגן ישיבה בחורים איבער די נושא פון מיליטערישע דינסט.