היסטארישע שול אין וויען עפנט ווידער אירע טויערן נאך א צען-חודש'דיגע רענאוואציע פראיעקט

די היסטארישע 'שטאדט-טעמפל' שול אין וויען האט ווידער געעפנט אירע טויערן פאר די ארטיגע אידישע קהילה נאך א ברייטע רענאוואציע פראיעקט וואס האט געדויערט צען און א האלב מאנאטן, צוריקברענגענדיג די טעגליכע תפילות צו איינע פון די וויכטיגסטע צענטערן פון אידישקייט אין עסטרייך.

די שול איז פריש געעפנט געווארן דעם 9'טן סעפטעמבער מיט א גרויסע הכנסת ספר תורה. ארום 450 מיטגלידער פון די וויענער אידישע קהילה האבן באגלייט דעם נייעם ספר תורה מיט א פראכטפולע פראצעסיע פון די 'יודנפלאץ' ביז צו די שול אויף די זייטנשטעטנגאסע, בעפאר מ'איז אריין אינעם איבערגעפרישטן בנין. דערנאך זענען קביעת מזוזות אפגעראכטן געווארן און די קהילה האט זיך צוזאמגענומען פאר די תפילות.

די ווידער-עפענונג קומט אין די צייט וואס די שול צייכנט אפ איר 200'סטע יארטאג. די שול, וואס איז געבויט געווארן אין די 1820'ער יארן, איז היינט צוטאגס די גרעסטע שול אין גאנץ עסטרייך, און די איינציגסטע גרויסע וויענער שול וואס האט איבערגעלעבט די נאוועמבער 1938 פאגראמען (קריסטאל נאכט) און איז געבליבן אין באנוץ אן קיין איבעררייס.

די רענאוואציע, וואס האט אפגעקאסט 10.5 מיליאן יורא, האט גענומען אין באטראכט סיי דעם היסטארישן כאראקטער פונעם בנין און סיי די געברויכן פון די היינטיגע קהילה. די ארבעט האט אריינגערעכנט דאס איבערפרישן די בימה און אנדערע היסטארישע טיילן פונעם ביהמ"ד, אינאיינעם מיט פארבעסערונגען צו פייער שוץ, סעקיוריטי, צוטריטליכקייט, קלימאט סיסטעמען, און אנדערע אינפראסטרוקטור פאר די קהילה.

דער פראיעקט איז פינאנצירט געווארן דורך ביישטייערונגען פון די עסטרייכישע פעדעראלע רעגירונג, די שטאט וויען, און פריוואטע נדבנים. לויט די אידישע קהילה, איז שוין אויפגעטריבן געווארן ארום 95 פראצענט פון די קאסטן פונעם גאנצן פראיעקט.

מיט די עפענונג קערט זיך די קהילה צוריק צו איר היסטארישן גייסטיגן צענטער, בעפאר די אפיציעלע צוויי-הונדערט-יאריגע פייערונגען. א באזונדערע צענטראלע צערעמאניע אפצוצייכענען דעם 200'סטן יארטאג איז געפלאנט פאר סעפטעמבער 16.