שטורמישע פראטעסטן אין ירושלים: הונדערטער אידן פראטעסטירן קעגן די 'לייט רעיל' בוי-ארבעט אויף בר אילן

הונדערטער חרדי'שע אידן זענען דאנערשטאג אויפדערנאכט ארויסגעקומען פראטעסטירן קעגן די אנגייענדע בוי-ארבעט פון די 'לייט רעיל' אין די בר אילן געגנט אין ירושלים. די פראטעסטן האבן עסקאלירט ווען די פראטעסטירער האבן דורכגעבראכן די צוימען און פרובירט אריינצודרינגען אינעם קאנסטראקשן סייט.

די מאסן-פראטעסט איז פארגעקומען לענגאוס די רוטע וואו מען בויט די נייע באן ליניע אין צפון ירושלים, וואו די קעגנערשאפט צום פראדזשעקט האט שוין עטליכע מאל ארויסגעברענגט מאסן מענטשן אין די גאסן אין די לעצטערע חדשים.

ביי די דאנערשטאג-נאכט פראטעסטן, האבן די פארזאמלטע אראפגעריסן די צוימען וואס ארומנעמען דעם ארבעטס-זאנע און האבן פרובירט אריינצוגיין אינעם סייט, לויט ווי די ארטיגע מידיא באריכטעט. ווי אויך זענען קאנסטראקשן מאטעריאלן אויפן פלאץ אונטערגעצינדן געווארן.

די בוי-ארבעט אויף רחוב בר אילן איז שוין א לענגערע צייט דער צענטער פון א קאמפיין דורך גרופעס אין די חרדי'שע קהילה וועלכע זענען שארף קעגן דאס אויסברייטערן די לייט רעיל דורכאויס די היימישע געגנט.

פריערדיגע פראטעסטן האבן שוין עטליכע מאל שטארק געשטערט דעם טראפיק און די בוי-ארבעט. די פאליציי האט איבערגעגעבן אז ביי א פראטעסט דעם 10'טן אוגוסט, האבן פראטעסטירער פרובירט צו בלאקירן די גאסן און אנמאכן שאדנס צום קאנסטראקשן סייט, בשעת אן אנדערע פראטעסט אין יולי האט אריינגענומען דאס בלאקירן גאסן און אונטערצינדן פייערס נעבן די רוטע.

די אנגייענדע קאנפראנטאציעס האבן שוין אנגעמאכט ריזיגע שאדנס פארן פראדזשעקט. דער טראנספארטאציע מיניסטעריום האט נאך אין יולי געמאלדן אז די וואנדאליזם פארבינדן מיט די פראטעסטן האט אנגעמאכט שאדנס אין די ווערד פון א געשאצטע 600 מיליאן שקל, און האט אפגעשטיפט די ארבעט אויף די לייט רעיל מיט בערך צוויי יאר.