באריכט: געהיימע געשפרעכן צווישן ליבערמאן און חרדי'שע פירער איבער א 'גיוס' אפמאך אין אויסטויש פונעם פרעמיער מיניסטער פאסטן

לויט א נייע באריכט, האבן פארטרעטער פון אביגדור ליבערמאן אפגעהאלטן געהיימע געשפרעכן מיט הויכראנגיקע חרדי'שע פירער, איבער א מעגליכע דיעל וואס זאל מאכן ליבערמאן אלס פרעמיער מיניסטער, אין אויסטויש פאר גרויסע נאכגיבונגען אינעם סענסיטיוון 'חוק הגיוס'.

ווי עס ווערט באריכטעט דורך דעם מדינת ישראל 'קאנאל 13', האט דער פארשלאג אריינגערעכנט א צוזאג אפצושטעלן די ארעסטן אויף ישיבה בחורים איבער די מיליטער דינסט, ווי אויך דורכצופירן א געזעץ וואס זאל געבן פולע פטורים פון מיליטער אן קיין שום קרימינאלע אדער פינאנציעלע שטראפן.

די באריכטעטע געשפרעכן זענען פארגעקומען צווישן ליבערמאן'ס נאענטער ראטגעבער אבי אבוחצירא און דער ירושלים'ער מעיאר משה ליאון. דאס קומט טראץ וואס ליבערמאן איז שוין יארן לאנג באקאנט אלס א שארפער קעגנער צו געבן פטורים פאר חרדים פון מיליטער, און האט שטענדיג געפירט א שארפע קאמפיין קעגן די חרדי'שע ציבור.

אין די לעצטע צייט האט ליבערמאן טאקע אויסגעדרוקט א גרייטקייט צו מאכן קאמפראמיסן איבער די גיוס געזעצן, אבער דערווייל איז נאך נישט באשטעטיגט געווארן קיין שום ענדגילטיגע אפמאך צווישן די צוויי זייטן.