קאנאדישע חסידישע ארגאניזאציע אפעלירט צום יו-ען איבער די אנקלאגעס קעגן אנטווערפענער מוהלים
גאלערי
קוויבעק חסידישע קאונסיל ווענדט זיך צו די 'יו-ען' איבער אנגייענדע געריכטליכע פראצעדורן קעגן צוויי מוהלים אין אנטווערפן
די 'אידישע חסידישע קאונסיל פון קוויבעק' האט אריינגעגעבן אן אפיציעלע אפיל צו די פאראייניגטע פעלקער (יו-ען) איבער אנגייענדע געריכטליכע פראצעדורן קעגן צוויי מוהלים אין אנטווערפן, בעלגיע, וועלכע זענען אנגעקלאגט געווארן פארן דורכפירן ברית'ן אן קיין אפיציעלע מעדיצינישע ערלויבעניש.
די קעיס רעדט זיך פון צוויי באקאנטע און ערפארענע מוהלים, הרב אהרן עקשטיין הי"ו, 76 יאר אלט, און הרב משה דוד לאנדא הי"ו, 47 יאר אלט, וועלכע שטייען אויס קלאגעס אז זיי האבן דורכגעפירט ברית'ן אן פארמאגן די נויטיגע מעדיצינישע לייסענס.
אין זייער ווענדונג האט די ארגאניזאציע פארלאנגט א דרינגענדע אריינמישונג פונעם יו-ען'ס ספעציעלן פארשטייער פאר רעליגיעזע פרייהייט. זיי טענה'ן אז די פראקורירן און אנקלאגן די מוהלים איז א דירעקטע סכנה פאר רעליגיעזע פרייהייט און שטערט די מעגליכקייט פאר אידישע פאמיליעס מקיים צו זיין די הייליגע מצוה פון ברית מילה אומגעשטערט.
די ארגאניזאציע האט געווארנט מיט א שארפן טאן, אז אויב די רעגירונג וועט אנהייבן פארלאנגען אז יעדע ברית מוז ווערן דורכגעפירט בלויז דורך א לייסענסד דאקטאר, קען דאס חלילה שטארק באגרעניצן און שטערן די לאנגיעריגע רעליגיעזע פירונגען פון די ארטאדאקסישע אידישע קהילה אין אנטווערפן.