נייע שטודיע צייגט: דראסטישע טוישונגען אין די זיכערהייט געפילן ביי בריטישע אידן זינט די אקטאבער 7 אטאקעס

א ברייט-פארנעמיגע נייע שטודיע איבער די אידישע קהילה אין ענגלאנד צייגט אן ערנסטע טויש אין וויאזוי ארטיגע אידן קוקן אן דעם פראבלעם פון אנטיסעמיטיזם און זייער פערזענליכע זיכערהייט, אין די דריי יאר זינט די בלוטיגע אקטאבער 7 אטאקעס.

די פארשער האבן נאכגעפאלגט ארום 2,500 בריטישע אידן דורך עטליכע אנקעטעס, וואס האט זיי געגעבן די מעגליכקייט צו פארגלייכן די מיינונגען פון די זעלבע מענטשן בעפאר און נאך אקטאבער 7.

איינע פון די שארפסטע טוישונגען איז געווען איבער די טעמע פון אנטיסעמיטיזם. בעפאר אקטאבער 7 האבן בלויז 17 פראצענט פון די באטייליגטע באצייכנט אנטיסעמיטיזם אין ענגלאנד אלס א "זייער גרויסע פראבלעם". היינט צו טאגס איז דער ציפער ארויפגעשפרינגען צו אן אומגלויבליכע 50 פראצענט.

די געפילן פון זיכערהייט זענען אויך דראסטיש געפאלן, ווען פיל מער אידן אין ענגלאנד דרוקן אויס ערנסטע זארג איבער די שרעקליכע כוואליע פון אנטיסעמיטיזם און זייער סעקיוריטי אינעם לאנד.

אינטערעסאנט איז אבער, אז די שטודיע האט אויך געפונען אז די אידישע אידענטיטעט און די קשר צו די קהילה איז געווארן פיל שטערקער ביי אסאך פון די באטייליגטע נאך אקטאבער 7, כאטש וואס דאס האט זיך נישט דוקא איבערגעזעצט אין א העכערונג אין שמירת המצוות אדער באזוכן אפטער אין שול.

די געפינענסן שטעלן פאר א קלארע בילד וויאזוי דריי יאר פון אן אנגעצויגענע אטמאספערע און זארג איבער אידישע זיכערהייט האבן אפעקטירט איינע פון די גרעסטע אידישע קהילות אין אייראפע. אין די זעלבע צייט צייגן די פארשער אן אז די אפעקט איז נישט געווען די זעלבע ביי יעדן, נאר עס זענען דא אונטערשידן געווענדט לויט די יארגאנג און רעליגיעזע בעקגראונד פון די מענטשן.

דער פאקט וואס די שטודיע איז באזירט אויף די זעלבע גרופע מענטשן וואס זענען איבערגעפרעגט געווארן עטליכע מאל, גיט פאר די פארשער א זעלטענע געלעגנהייט צו מעסטן פונקטליך וויאזוי די צוגאנג האט זיך געטוישט מיט די צייט, אנשטאט פשוט צו פארגלייכן צוויי אנדערע גרופעס.