ריזיגע וואלד-פייער אין די 'בן שמן' וועלדער אין ארץ ישראל פירט צו מאסיווע עוואקואציעס און הייוועי פארמאכונגען

א מאסיווע וואלד-פייער האט מיטוואך נאכמיטאג, אקטאבער 28, ארומגעכאפט די 'בן שמן' וואלד געגנט אין צענטראל ארץ ישראל. די פלאמען האבן געצווינגען די באאמטע צו עוואקואירן ארום 400 שפאצירער און אפצושפארן עטליכע הויפט הייוועיס, בעת פייערלעשער האבן געקעמפט מיט די פלאמען וואס האבן זיך שנעל פארשפרייט.

דאס פייער האט אויסגעבראכן נעבן די בן שמן אינטערסעקשאן און זיך פארשפרייט דורכאויס די ביימער פונעם געגנט פונעם חדיד בית החיים אין ריכטונג פון נאות קדומים. שטארקע ווינטן האבן צוגעגעבן ברענשטאף צום פייער, שיקנדיג שווערע רויך איבער די ארומיגע גאסן און שאפנדיג א געפאר פאר דרייווערס.

די פאליציי האט אפגעשפארט הייוועי 6 נארטבאונד און רוט 444 נעבן די בן שמן אינטערסעקשאן, און טראפיק אויף די דערנעבנדיגע הייוועי 1 איז אויך געווארן שטארק געשטערט. די פארמאכונגען האבן אנגעמאכט שווערע טראפיק, און דרייווערס זענען פארדיריגירט געווארן צו אנדערע וועגן.

די פייער און רעטונגס אגענטורן האבן לכתחילה ארויסגעשיקט 12 פייערלעשער קרעווס און זעקס פליגערס צו קעמפן מיט די פלאמען. אבער ווי די סיטואציע איז געווארן מער ערנסט, האט דער פייער קאמישינער, איל כספי, פארארדנט א נאציאנאלע מאביליזאציע, און ארום 50 פרישע פייערלעשער טיעמס זענען ארויסגערופן געווארן פון אלע עקן לאנד.

ספעציעלע רעטונגס פערסאנאל פון די 'להבה' יוניט זענען אויך אראפגעשיקט געווארן ארויסצוהעלפן טרעפן און עוואקואירן די שפאצירער פון די געגנטער וואס זענען געווען אין א דירעקטע געפאר פון די פארשפרייטנדע פייער.

די עמערדזשענסי קרעווס האבן קאנצענטרירט זייערע הויפט באמיאונגען צו קאנטראלירן דאס פייער און פארמיידן אז עס זאל זיך חלילה פארשפרייטן צו דערנעבנדיגע וואוינארטן און הויפט טראנזיט רוטס.

שפעט מיטוואך נאכמיטאג איז ענדליך געלונגען פאר די פייערלעשער צו ברענגען דאס פייער אונטער קאנטראל.

דער דעפיוטי פייער קאמישינער, עוז כהן, האט געזאגט אז די קרעווס האבן באוויזן צו קאנטראלירן די פלאמען אין אלע סעקטארן, טראץ וואס זיי האבן געארבעט אין שווערע טעריין אומשטענדן. די פייערלעשער זענען פארבליבן אויפן סצענע צו פארענדיגן די לעשן אפעראציעס און זיכער מאכן אז די געגנט איז פולשטענדיג פארזיכערט.

נאכדעם וואס די דירעקטע געפאר איז אריבער, האט די פאליציי צוריק געעפנט הייוועי 6 נארטבאונד און רוט 444 נעבן די בן שמן אינטערסעקשאן.

די באאמטע האבן ווייטער געבעטן פונעם פובליק צו זיין פאָרזיכטיג און פאלגן די פייער זיכערהייט אנווייזונגען בעת די עמערדזשענסי פערסאנאל ענדיגן זייער ארבעט. די אורזאך פונעם פייער איז דערווייל נאך נישט באקאנט.