עמערדזשענסי לאנדונג אין קאנאדע: אן 'ארקיע' פליגער פון ניו יארק קיין ארץ ישראל פארקריכט פון וועג נאך א מעדיצינישע אינצידענט

אן 'ארקיע' פליגער אויפ'ן וועג פון ניו יארק קיין ארץ ישראל איז געצווינגען געווארן צו מאכן אן עמערדזשענסי לאנדונג אין קאנאדע, נאכדעם וואס א פאסאזשיר האט געליטן פון א מעדיצינישע עמערדזשענסי בעת דער פליגער איז געווען הויך אין די לופטן העכערן אטלאנטישן אקעאן.

פלייט נומער IZ992 האט זיך געהויבן פון דזשעי-עף-קעי (JFK) עירפארט מאנטאג אוונט, אקטאבער 19, אויפ'ן וועג צום בן גוריון עירפארט. לויט באריכטן, האט א פאסאזשיר אנגעהויבן שפירן שווערע בויך ווייטאגן אינמיטן די רייזע, וואס האט געפירט די מאנשאפט צו טוישן די רוטע און אראפגיין אין די 'גענדער אינטערנאציאנאלע עירפארט' אין ניופאונדלענד, קאנאדע.

באריכטן געבן אן אז א מעדיצינישע רעזידענט און א נוירס, וועלכע זענען צופעליג געווען צווישן די פאסאזשירן, זענען תיקף צוגעקומען צו הילף און אנגעהויבן באהאנדלען דעם פאציענט נאך בעת דער פליגער איז געווען אין די לופטן. די פיילאטן האבן דערווייל דערקלערט אן עמערדזשענסי און אראפגענידערט דעם 'עירבאס A330' פליגער קיין גענדער, וואו לאקאלע עמערדזשענסי פערסאנאל האבן שוין אפגעווארט דעם פליגער ביים לאנדונג.

דער פליגער האט געלאנדעט בשלום, און דער פאסאזשיר איז איבערגעגעבן געווארן פאר די אמבולאנס מאנשאפט וואס איז געשטאנען גרייט נעבן דעם פליגער אים צו באהאנדלען. נאך די עמערדזשענסי לאנדונג האט דער פליגער באקומען ערלויבעניש צו פארזעצן מיט די רייזע אן דעם וואס מען זאל דארפן אראפלאדן די באגאזשן פון די פאסאזשירן.

דער פליגער האט זיך דערנאך געהויבן פון גענדער און ווייטער פארגעזעצט די רייזע קיין ארץ ישראל. די יעצטיגע מעדיצינישע מצב פונעם פאסאזשיר איז דערווייל נישט באשטעטיגט געווארן פאר די פובליק.