לקראת חודש אלול און די קומענדיגע ימי הסליחות, גרייטן זיך חסידי סאטמאר אין קרית יואל צום יערליכן מנהג פון אריינגיין צום רבי'ן אפצוגעבן א קוויטל.

צוליב דעם גרויסן ציבור און די לאנגע שעות וואס מען דארף געווענליך ווארטן, האט די קהילה ארויסגעגעבן א מודעה מיט א נייעם און קלארן סדר צו מאכן דעם פראצעס פיל גרינגער.

דער נייער סדר האטזיך אנגעהויבן נעכטן זינטאג, און איז צעטיילט אין צוויי: ערשטנס איז דא א "שנעלע רייע" יעדן טאג פון 6:00 ביז 7:00 אין פארנאכטס.

די שעה איז בלויז פאר טאטעס מיט קינדער וואס קומען איבערגעבן דעם קוויטל און הערן א ברכה, אן קיין פריוואטע שאלות אדער לענגערע שמועסן, וואס וועט לויפן גאר שנעל.

צווייטנס, פאר ווער עס ברויך יא א פריוואטע אריינגאנג און מער צייט: ווי משפחות, מענטשן וואס קומען פרעגן אן עצה, אדער חברי ‘אהבת קדומים’,  וועלן זיין באשטימטע שעות שפעטער ביינאכט, צווישן 8:00 און 10:30.

די קהילה בעט אויך פונעם ציבור אז מ'זאל ניצן די געלעגנהייט און אריינגיין שוין יעצט אין די ערשטע טעג פון חודש אלול, כדי אויסצומיידן דאס גרויסע געדרענג און שווערע ווארטן וואס מאכט זיך ווען מ'ווארט ביז די ימי הסליחות.