אמעראטישער ראטגעבער ווארנט: דער מיטל-מזרח זאל זיך גרייטן אויף א לענגערע תקופה פון אומזיכערקייט נאך די איראן מלחמה

אנוואר גארגאש, דער דיפלאמאטישער ראטגעבער צום פרעזידענט פון די פאראייניגטע אראבישע עמיראטן (UAE), האט ארויסגעשטעלט א שארפע ווארענונג אז דער מיטל מזרח דארף זיך אנצוגרייטן אויף א לענגערע פאזע פון אומזיכערקייט נאכדעם וואס די מלחמה מיט איראן וועט זיך ענדיגן.

אויפטרעטנדיג ביי די 'אבו דאבי סטראטעגישע דעבאטע', האט גארגאש קלארגעשטעלט אז מען קען נישט ערווארטן קיין קלארע רעזאלוציע אדער א סטאבילע סדר אינעם ראיאן גלייך נאכן קאנפליקט. ער האט אנגעוויזן אז צוריק עפענען די קאמוניקאציע ליניעס מיט טעהראן איז א "סטראטעגישע וויכטיגקייט" און נישט קיין נאכגיביגקייט, אונטערשטרייכנדיג אז דיפלאמאטישע קאנאלן מוזן בלייבן אפן אפילו אינמיטן ערנסטע זיכערהייט זארגן.

דער ראטגעבער האט ארגומענטירט אז א קראנטע מיליטערישע אפשרעקונג איז קריטיש וויכטיג, וויבאלד א לאנד'ס נאציאנאלע זיכערהייט קען זיך נישט פארלאזן בלויז אויף די גוטע ווילן פון א צווייטע לאנד. אבער, האט ער צוגעגעבן, די מיליטערישע קראפט דארף דינען אלס א מיטל אפצוהאלטן ווייטערדיגע אגרעסיעס און צו שאפן די ריכטיגע אומשטענדן וואו ערנסטע דיפלאמאטיע קען זיין סוקסעספול. לויט אים, גייען מיליטערישע אפשרעקונג און פארהאנדלונגען האנט-אין-האנט צו פארזיכערן דעם ראיאן.

גארגאש האט ווייטער ארויסגעברענגט אז צוריק אויפבויען צוטרוי נאך א מלחמה פאדערט סאך מער ווי בלויז פובליק סטעיטמענטס אדער דיפלאמאטישע צוזאגונגען. ער האט געזאגט אז צוטרוי קען נאר צוריקגעשטעלט ווערן דורך פראקטישע שריט, קראנטע התחייבות'ן, און א קלארע, באווייזבארע טויש אין אויפפירונג.

די קאמענטארן שפיגלען אפ די אפיציעלע פאזיציע פון די עמיראטן, אז ראיאנאלע סטאביליטעט וועט פאדערן סיי שוץ-מיטלען קעגן צוקונפטיגע סטראשונגען און סיי אן אנגייענדע דיפלאמאטישע פארבינדונג מיט איראן. זיין ווארענונג צייגט אויך אויף די מעגליכקייט אז די אנגעצויגנקייט אינעם מיטל מזרח קען אנהאלטן אפילו נאכדעם וואס די אקטיווע שלאכטן קומען צו אן ענדע, בפרט אויב די הויפט זיכערהייט פראבלעמען ווערן נישט געלייזט.

פאר די גאלף לענדער וועט די הויפט טשעלענדזש זיין וויאזוי צו באשיצן זייערע נאציאנאלע אינטערעסן, בשעת'ן פרובירן צו זען צי טעהראן איז טאקע גרייט צו ווייזן א בלייבנדע טויש אין אירע ראיאנאלע אקטיוויטעטן. גארגאש'ס הויפט מעסעדזש איז געווען קלאר: דיפלאמאטיע אן קיין ערנסטע מיליטערישע אפשרעקונג איז נישט גענוג, אבער אפשרעקונג אן קיין דיפלאמאטישע פלאן פאר די צוקונפט קען אויך נישט ברענגען קיין בלייבנדע סטאביליטעט.