בס"ד

דראמאטישע סצענעס אין תל אביב: א דריי-שטאקיגע געביידע אינמיטן רענאוואציעס איז פלוצלינג איינגעפאלן

א טייל פון א געביידע וואס האלט אינמיטן ווערן איבערגעבויט איז מיטוואך אינדערפרי צוזאמגעפאלן אויף נחלת בנימין סטריט אין תל אביב, נעבן ראטשילד בולעווארד.

זיכערהייט קאמערעס האבן אויפגעכאפט דעם דראמאטישן מאמענט ווי א מאן וואס איז געזעצן אויף א באנק דערנעבן האט זיך אויפגעשטעלט און אנגעהויבן לויפן, בשעת אנדערע פארבייגייער זענען אויך אנטלאפן פונעם ארט ווען די געביידע איז אראפגעקומען אין א ריזיגע וואלקן פון שטויב.

בחסדי שמים איז די דריי-שטאקיגע געביידע געווען ליידיג אין די צייט פונעם אינצידענט. די בנין איז שוין ליידיג פון איינוואוינער פאר עטליכע וואכן צוליב די קאנסטראקשן און פארשטערקערונג ארבעט וואס קומט דארט פאר. לויט ערשטע באריכטן, האבן עטליכע קאנסטראקשן ארבעטער פארלאזט די געביידע ממש קורצע מינוטן בעפאר עס איז איינגעפאלן. די אטאריטעטן האבן באשטעטיגט אז דערווייל זענען נישט דא קיין באריכטן איבער פארוואונדעטע.

רעטונגס אגענטורן, אריינגערעכנט מגן דוד אדום, פאליציי אפיצירן פונעם ירקון דיסטריקט, און פייערלעשער זענען אנגעקומען אויפן סצענע אין בלויז עטליכע מינוט. די קרעפטן האבן תיכף אנגעהויבן זוכן אין די ברוכווארג צו מאכן זיכער אז קיינער איז נישט פארכאפט געווארן אונטער די חורבות. כוחות פון 'פיקוד העורף' זענען אויך אראפגערופן געווארן ארויסצוהעלפן מיט די אפעראציעס.

די פאליציי האט אפגעשפארט עטליכע אינטערסעקשאנס אין די געגנט, אריינגערעכנט ביי הרצל און אחד העם, נחלת בנימין און מונטיפיורי, און ראטשילד און נחלת בנימין, צו קאנטראלירן דעם טראפיק און פארזיכערן די געגנט. דער אינצידענט האט אנגעמאכט שווערע טראפיק אינעם צענטראלן קאמערציאלן טייל פון שטאט דורכאויס די פארמיטאג שעה'ן.

איינוואוינער און געשעפטס אייגנטומער אין די געגנט האבן דערציילט אז זיי האבן געהערט א מעכטיגע אויפרייס און האבן אנהייב מורא געהאט אז עס רעדט זיך פון א טעראר אטאקע, ביז זיי האבן איינגעזען אז עס איז א געביידע וואס איז איינגעפאלן. ערשטע שאצונגען צייגן אז עס איז מעגליך געווען א טעכנישע דורכפאל דורכאויס די רענאוואציע פראצעס, אבער א פולע אויספארשונג קומט יעצט פאר. עמערדזשענסי קרעפטן ארבעטן ווייטער צו סטאביליזירן דעם איבערגעבליבענעם טייל פון די בנין עס זאל נישט ווייטער פאלן בעת זיי ענדיגן זוכן די ברוכווארג.