טויזענטער אידן שלומי אמוני ישראל תושבי עיר בארא פארק, ובראשם פילע אדמור"י ורבני העיר שליט"א האבן דעם פארלאפענעם מאנטאג פרשת נשא ב' סיון איבערגעפולט עד אפס מקום די פראכטפולע עטרת גאלדא און ליפשיץ זאלן אין צענטער פון שטאט, און אנטייל גענומען בגוף ובממון ביים דערהויבענעם דינער השנתי 'מסורה' לטובת די אור אלטע מסורה'דיגע צדקה, 'צדקת רבי מאיר בעל הנס כולל חבת ירושלים'.

די דינער האט היי יאר געטראגן א טיפערע און העכערע באדייט מיט דעם וואס אינאיינעם מיט די דינער 'מסורה' ווי מ'האט זיך מחזק געווען במסורת אבותינו ורבותינו הק' בכל הדורות בכלל, איז בפרטיות אפגעצייכענט געווארן דעם יובל מאה וחמישים שנה להסתלקות קודש הקדשים מרן רביה"ק מצאנז זי"ע נשיא הכולל וואס האט זיך כידוע מוסר נפש געווען לטובת כולל חבת ירושלים, און במשך פונעם גאנצן נאכט.

א געפיל פון פארצייטישע מסורה האט ארומגענומען אלע משתתפים אנקומענדיג צום דינער ווי ביים אריינקומען איז געלעגן אויסגעשטעלט א הערליכע 'זכור ימות עולם' אויסשטעלונג פון צענדליגע חפצי קודש און כתבי ידות מרבותינו הק' נשיאי הכולל און ראשי השלשלת, אזוי אויך אור אלטע פושקעס פונעם כולל און קבלה צעטלעך פון צענדליגע צענדליגע יארן צירוק וואס האט דעמאנסטיריט איין מאל און נאכאמאל די היסטארישע און הייליגע מסורה פון אלע אונזערע עלטערן און רבי'ס צו כולל חבת ירושלים.

די דערהויבענע נאכט איז געווארן תוכן'דיג אנגעפירט דורך די אלעמען באקאנטע יושב ראש הרב ישראל שטערן הי"ו פון לאנדאן וואס האט מיט זיין הערליכע לשון לימודים מהנה געווען בדברים נעימים און אויפגעפלאמט דעם ציבור להחזקת הצדקה הק'.

א רייכע סעודה איז סערווירט געווארן לכל הקהל הקודש, באגלייט מיט נאסטאלגישע מוזיקאלישע קלאנגען, דורך ר' הערשל ראטטענבערג פון אנטווערפען, אינאיינעם מיט די שירה קאפעליע, וואס האט אריינגעברענגט א געשמאק במשך פונעם אווענט.

טראצדעם וואס די זאל איז געווען אויסגעשטעלט אויף די גרעסטע פארנעם שייך צו קענען אריינעמען דעם פילקעפיגער עולם, איז די גאנצע זאל געווען איבערגעפולט מלא על כל גדותיו, צוליב די ריזן פלייץ פונעם ציבור המשתתפים במשך הלילה וואס זענען געקומען אנהאלטן און זיך מקשר זיין מיט די מסורה מאבותינו ורבותינו הק'.

א הערליכע הויכשטאקיגע בימת הכבוד האט באשיינט די אויבנאן פונעם זאל, ווי עס זענען זענען געזעצן אויסגעשורה'ט מערערע גדולי הדור, אדמור"י ורבני העיר, דיינים ראשי ישיבות ומרביצי תורה שליט"א וואס האבן איבערגעפילט דעם צויי שטאקיגן אויבנאן און ארויסגעוויזן זייער הערצה און שטיצע פאר דעם הייליגע'ן און מסורה'דיגן צדקה.

ספעציעלע מתנות און ווערדפולע זילבערנע חפצים זענען פארטיילט געווארן פאר די חשובע תומכים, אזוי אויך איז פארטיילט געווארן פאר אלע משתתפים די נייע הערליכע ספר 'שפע החיים' מנשיא הכולל מרן רביה"ק בעל דברי חיים מצאנז זי"ע יו"ל ומנדבת לבו הטוב פון הנדיב המפורסם, מו"ל ספרי הצדיקים הרב יואל לאנדא שליט"א.

ביים דינער האט די יושב ראש ר' ישראל שטערן צום ערשט אויפגערופן די לאנגיעריגע געטרייע מנהל הכולל הגה"צ רבי ישכר בעריש רובין שליט"א אדמו"ר מדאמבראווא וואשינגטען הייטס וואס האט מיטגעטיילט מיט אלע משתתפים איבער די ריזיגע פעלות צדקה וחסד פונעם כולל און די חשיבות פון דעם פושקע ביי אלע צדיקים,

דערנאך האט די מנהל דערמאנט מיט בענקשאפט הרה"ח ר' אפרים פאסטען ע"ה בן הרה"ח ר' אלעזר פאסטען ז"ל מנאמני חברי הנהלת הכולל וואס דינער איז געווען מוקדש לעילוי נשמתו.

דערנאך האט מען ארויפגערופן די 'פרס תורתו דרבי מאיר' הרב הגאון ר' נפתלי בנימין פאשקעס מרבני ק"ק צאנז קלויזענבורג ור"י שערי התורה ןןאס האט אויפגעטרויטן מיט א קורצע דרשה איבער די חיוב און זכות צו שטיצן דעם כולל.

די יושב ראש האט אויפגערופן די צוויי חשוב'ע 'נזר נחלת אבות', חשוב'ע בנן של קדושים אייניקלעך פונעם נשיא הכולל רביה"ק בעל דברי חיים מצאנז זי"ע, הרב מרדכי ראבין שליט"א אב"ד עטרת אברהם ווישניצא לעיקוואד און הרב הערשל הלברשטאם שליט"א זאלן איבערנעמען זייער פרס מיט א אנטיק לעדערנע סעט דברי חיים.

די מנהל הכולל הרה"צ רבי בעריש רובין האט מיט ווארעמקייט אויפגערופן דעם 'פרס חבת ירושלים – תנו כבוד לתורה' הגה"צ רבי חיים שלמה הלברשטאם שליט"א סגן דומ"ץ באבוב וחתנא דבי נשיאה כ"ק מרן אדמו"ר מבאבוב שליט"א נשיא הכולל, אויפצוטרעטן מיט די דבר המסורה ווי די חשוב'ע דיין האט ארומגערעדט מיט א ווארעמקייט איבער די אויסטערלישע חבת הקודש און הערצה וואס אלע צדיקים האבן געהאט צום כולל ובמיוחד זקינו הרה"ק בעל דברי שלמה זצ"ל נשיא הכולל.

דערנאך האט מען בכבוד הראוי אויסגערופן די דריי 'נזר גבאי קודש', בנן של צדיקים וקדושים און הולכים בדרכי אבות הרב ר' אלכסנדר אשר יונגרייז שליט"א, הרב ר' שמחה ישכר בער רובין שליט"א און הרב ר' שמואל אבא הלברשטאם שליט"א.

מיט דערהויבענקייט האט די יושב ראש ר' ישראל שטערן איבערגעגעבן די ווארימע ברכת הקודש וואס די נשיא הכולל כ"ק מרן אדמו"ר מצאנז קלויזענבורג שליט"א האט געשיקט איבערגעבן בשמו לכל העם הנאספים נאך וואס אנדערש ווי געפלאנט האט די רבי האט זיך לעצט מינוטיג נישט געקענט פרעזענליך משתתף זיין צוליב א חולשה.

דער הויכפונקט פון די נאכט איז געווען די צענטראלע דרשה פונעם אורח הכבוד פון ארץ ישראל, פה מפיק מגליות מלהיב לבבות ישראל הגה"צ רבי פינחס פרידמאן שליט"א ראש הכוללים דחסידי בעלזא וראש ישיבת מבקשי השם וועלכער האט מיט זיין אש קודש אויפגעפלאמט אלע הערצער מיט גאר ווארימע און הארציגע דיבורים איבער די געוואלדיגע סגולה פון דעם צדקה און וואו עס איז געווען קודש קדשים ביי אלע פריערדיגע צדיקים כידוע, צו שטיצן כולל חבת ירושלים לצדקת רבי מאיר בעל הנס, ווערטער וואס האבן געהאט א געוואלדיגע השפעה אויפן גאנצן ציבור.

די ריזן ציבור האט פארלאזט דעם זאל נאך א הערליכע פראגראם, און אהיימגענומען פילע שיינע מתנות, ועל כולם די פילע ברכות, סגולות וישועות עד אין שיעור וערך פון שטיצן דעם הייליגען מסורה'דיגן קופה כולל חבת ירושלים לצדקת רבי מאיר בעל הנס.