ירושלים. — דער מדינת ישראל פרעזידענט יצחק הערצאג האט ארויסגעשיקט א פערזענליכן בריוו פון אנערקענונג פאר דעם 'פליי-דובאי' קאפיטאן, סמיט מאטשאר, צו באדאנקען און אנערקענען זיין העלדישקייט דורכאויס דעם שרעקעדיגן היידזשעקינג פרואוו וואס איז פארגעקומען דעם 30'סטן סעפטעמבער, וואו ער האט געהאלפן באשיצן די פאסאזשירן אויפ'ן עראפלאן.

דער קאפיטאן האט ערהאלטן דעם בריוו אינעם שפיטאל אין די פאראייניגטע אראבישע עמיראטן (UAE), וואו ער ערהוילט זיך נאך פון דעם שרעקליכן אינצידענט.

אין זיין מעסעדזש האט הערצאג אויסגעדרוקט א טיפע דאנקבארקייט פאר דעם קאפיטאן'ס קוראזש און אים געוואונטשן א שנעלע און פולשטענדיגע ערהוילונג. דער פרעזידענט האט אים אויך פערזענליך איינגעלאדנט אפצושטאטן א באזוך אין ירושלים ווי נאר זיין געזונט צושטאנד וועט עס ערלויבן.

הערצאג האט געמאלדן אז ער פלאנירט צו באערן דעם קאפיטאן מיטן "פרעזידענטליכן מעדאל פאר ציווילע העלדישקייט", אלס אנערקענונג פאר זיינע קריטישע שריט דורכאויס די אטאקע.

דער בריוו קומט נאכדעם וואס עס איז פריער אפגעראכטן געווארן א ספעציעלע צערעמאניע צו באערן זעקס מדינת ישראל פאסאזשירן וועלכע האבן ארויסגעהאלפן אפצושטעלן דעם היידזשעקינג פרואוו אויפ'ן פליי-דובאי פליגער. די יעצטיגע שריט לייגט א ספעציעלע געוויכט און אנערקענונג אויפ'ן קאפיטאן, וועמענס שנעלע רעאקציע אין די עמערדזשענסי מינוטן האט געהאלפן פארמיידן א מעגליכע שרעקליכע קאטאסטראפע.