שטורמישע ראיאטן אין שפאניע: פאליציי קלאפט זיך צוזאם מיט פראטעסטירער ביי א רעכטע ראלי אין פאמפלאנא

פאמפלאנא. – די שטאט פאמפלאנא אין שפאניע האט זיך דאנערשטאג אוונט פארוואנדלט אין א קעסל פון כאאס, ווען דער רעכטער קאמענטאטאר וויטא קווילעס איז אנגעקומען אין שטאט אפצוהאלטן א ראלי, אינדערצייט וואס הונדערטער פראטעסטירער האבן אים אפגעווארט.

די ארטיגע באאמטע האבן שוין פון פריער געהאט אריבערגעפירט דעם איווענט פון די 'פלאזא דעל קאסטיליא' צענטער צו די 'פלאזא יאמאגוטשי', נאכדעם וואס די פאליציי האט געווארנט איבער מעגליכע אומרוען, געדענקענדיג די כאאס וואס האט אויסגעבראכן ביי זיין באזוך א יאר פריער. קווילעס איז אנגעקומען מיט ארום 45 מינוט שפעט, און האט גערעדט פאר קארגע צען מינוט צו א קליינע עולם פון צווישן 50 און 100 שטיצער, וועלכע זענען געווען ארומגענומען מיט א שווערע פאליצייאישע קייט. אין זיין קורצע רעדע האט ער דערקלערט אז דער ראיאן איז "מער שפאניש ווי קיינמאל בעפאר."

די גאנצע אנגעצויגנקייט קומט בלויז עטליכע וואכן נאכדעם וואס דער שפאנישער פרעמיער מיניסטער פעטרא סאנשעז האט גערופן פאר פריצייטיגע אלגעמיינע וואלן אויפן 29'סטן נאוועמבער. צוליב דעם ווערט יעדע פאליטישע ראלי און יעדע שטימע נאכגעפאלגט מיט גרויס שפאנונג.

אינדרויסן פון די פאליצייאישע באריקאדעס האבן הונדערטער לינקע און לאקאלע נאציאנאליסטישע פראטעסטירער מארשירט קעגן דעם ראלי, און די מצב האט זיך זייער שנעל פארוואנדלט אין געוואלדטאטן. די פראטעסטירער האבן אנגעהויבן ווארפן שטיינער און פלעשער אויף די אפיצירן, און האבן איבערגעדרייט און אונטערגעצינדן מיסט קאסטנס.

די 'רייאט פאליציי' האט רעאגירט מיט קראפט, ניצנדיג פראדזשעקטיילס צו צעטרייבן דעם המון. לאקאלע נייעס קוועלער גיבן איבער אז אמווייניגסטנס איין פראטעסטירער איז געטראפן געווארן אין קאפ. דריי מענטשן זענען ארעסטירט געווארן, אריינגערעכנט א 16-יעריגער וואס ווערט אנגעקלאגט פארן שטערן דעם פובליק סדר. פיר נאציאנאלע פאליציי אפיצירן האבן געליטן לייכטע וואונדן.

קווילעס רופט זיך אליין א זשורנאליסט, אבער די אלגעמיינע פרעסע אין שפאניע באצייכנט אים אלס אן אנצינדער און פראוואקאטאר, אינדערצייט וואס זיינע שטיצער טענה'ן אז ער קעמפט בלויז פאר 'פרי ספיטש' (פרייהייט פון ווארט). יעצט ווען די וואל קאמפיין הייבט זיך ערשט אן, איז די גרויסע פראגע צי די שטורמישע נאכט איז בלויז אן איינמאליגע אינצידענט, אדער א פאראויסזאגונג פון ווי אנגעצויגן די מצב גייט זיין אויפן וועג צו די נאוועמבער 29 וואלן.