בס"ד

שרעקליכע סצענע אין קראון הייטס: א באוואפנטער פארשוין מיט א מעסער יאגט נאך א ישיבה בחור אינמיטן די נאכט

א שרעקליכע סצענע האט זיך אפגעשפילט אויף די גאסן פון קראון הייטס מיטוואך פארטאגס, ווען א פארשוין באוואפנט מיט א מעסער האט נאכגעיאגט א ישיבה בחור איבער די געגנט, שרייענדיג אנטיסעמיטישע לאזונגען, אריינגערעכנט ווערטער וואס האבן געלויבט היטלער ימ"ש.

זיכערהייט קאמערעס האבן אויפגעכאפט דעם אטאקירער ווי ער יאגט נאך דעם יונגן בחור אראפ א טרעפ און איבער די גאס נעבן סטערלינג פלעיס און ברוקלין עוועניו, ארום 2:30 פארטאגס. דער פארשוין האט געווארפן מיסט קאסטנס אין זיין וועג בעת דער בחור איז געלאפן פאר זיין לעבן. דער בחור האט זיך ברוך השם געראטעוועט דורכ'ן אריינלויפן אין א פריוואטע הויז און אפהאקן די טיר ממש אין די לעצטע סעקונדע. ער איז ארויס אומגעשעדיגט פיזיש, אבער שטארק איבערגעשראקן.

דער אטאקירער איז אבער נישט אוועקגעגאנגען שטילערהייט. ער איז געבליבן שטיין אינדרויסן פונעם הויז און געשריגן סטראשונגען ווי "יעצט ווייס איך וואו דו וואוינסט", בעפאר ער האט אויפגעשניטן די רעדער פון עטליכע בייסיקעלס וואס זענען געשטאנען דארט און דערנאך אנטלאפן פונעם ארט.

באלד דערויף האט זיך אנגעהויבן אן אינטענסיווע און קאארדינירטע זוך-אקציע דורך די וואלאנטירן פון 'קראון הייטס שמירה' אינאיינעם מיט פאליציי אפיצירן פונעם 77'סטן פריסינקט. זיי האבן ארומגעזוכט אין די גאנצע געגנט ביז מען האט אפגעפונען דעם פארדעכטיגטן און אים ארעסטירט.

די אטאקע האט פאסירט אין הארץ פון די חב"ד-ליובאוויטש קאמיוניטי וואס איז יעצט פול מיט פילע יום טוב געסט, וואס דאס לייגט צו צו די אומרואיגקייט צווישן די איינוואוינער וועלכע זענען שוין ממילא אנגעצויגן נאך א רייע אנטיסעמיטישע אינצידענטן איבער ניו יארק סיטי דעם יאר. קאמיוניטי מיטגלידער באדאנקען זיך פאר די שנעלע רעאקציע פון די שמירה פאטראלן און די פאליציי, וואס האבן פארמיטן אן אינצידענט וואס וואלט זיך געקענט ענדיגן פיל ערגער חלילה. דער ארעסט ברענגט אביסל רואיגקייט פאר די געגנט וואס איז אויפגעטרייסלט געווארן פון נאך אן אקט פון האס, אבער עס דערמאנט אויך ווי שנעל א רואיגע גאס קען זיך פארוואנדלען אין א סצענע פון טעראר.