פאקיסטאן באשטעטיגט אפיציעל: "אונזערע מיליטערישע קרעפטן געפינען זיך שוין אויף דער ערד אין סאודי אראביע"

נאך לאנגע יארן פון שפעקולאציעס, האט פאקיסטאן ענדליך עפנטליך באשטעטיגט דאס וואס אסאך האבן שוין לאנג פארדעכטיגט אבער איז כמעט קיינמאל נישט אפיציעל געזאגט געווארן: אירע מיליטערישע קרעפטן געפינען זיך שוין אקטיוו אויף דער ערד אין סאודי אראביע.

אין אן אינטערוויו מיט די 'סי-ען-ען' נייעס אגענטור, האט דער הויפט מיליטערישער ווארטזאגער פון פאקיסטאן, לוטענאנט גענעראל אכמעד שאריף טשאדרי, איבערגעגעבן אז פאקיסטאנער טרופן אפערירן יעצט אינעם קעניגרייך אין פארשידענע מיליטערישע ראמען און פאזיציעס. טשאדרי האט אנגעוויזן אז דאס איז נישט קיין נייע זאך, אונטערשטרייכנדיג אז פאקיסטאן האלט שוין אן א מיליטערישע אנוועזנהייט אין סאודי אראביע פאר צענדליגע יארן, אלס א טייל פון א לאנג-טערמיניגע פארטיידיגונגס-באציאונג צווישן די צוויי לענדער.

ער האט צוגעגעבן אז די אליאנץ צווישן די צוויי לענדער איז נישט ארויסגעוואקסן פון איבערנאכט, נאר קומט פון טיפע דיפלאמאטישע, פאליטישע און מיליטערישע פארבינדונגען וואס זענען געבויט געווארן דורכאויס אסאך יארן.

די באשטעטיגונג קומט אין א גאר קריטישע צייט, ווען פאקיסטאן, סאודי אראביע און טערקיי ארבעטן אריינצושטעלן אין קראפט דעם "מעקא געמיינזאמע פארטיידיגונגס אפמאך" (Makkah Joint Defence Agreement). דער אפמאך, וואס איז אונטערגעשריבן געווארן אין אויגוסט, באשטעטיגט אז אן אטאקע אויף סיי וועלכע פון די דריי לענדער וועט ווערן באטראכט ווי אן אטאקע אויף אלע דריי.

אונטער דעם דיעל האבן די דריי לענדער זיך איינגעשטימט צו פארשנעלערן דאס אראפשטעלן ספעציפישע קרעפטן און מיליטערישע געצייג, אריינגערעכנט די מעגליכקייט פאר א שנעלע פארשטארקונג פון טרופן אויב עס פעלט זיך אויס.

דער שריט קומט אין א צייט וואס סאודי אראביע שטייט אויס פארמערטע סטראשונגען, אריינגערעכנט מיסיל און דראון אטאקעס וואס זענען פארבינדן מיט דעם אנגייענדן קאנפליקט מיט די הוטי רעבעלן. דאס רוקט דעם ניי-געפארעמטן אליאנץ פון בלויז פאפירן צו אן עכטע, אקטיווע מיליטערישע קאאפעראציע אויף סאודישער ערד.