באריכט: 'יהדות התורה' גרייט צו גיין אין א קאאליציע מיט גדי אייזנקאט, אבער דער 'חוק הגיוס' בלייבט דער הויפט שטרויכלונג

די חרדי'שע פראקציע 'יהדות התורה' קלערט ערנסט פון א מעגליכע פאליטישע קאאפעראציע מיט גדי אייזנקאט און זיין נייע 'ישר' פארטיי נאך די קומענדיגע וואלן. אבער די הויפט פראגע בלייבט צי אייזנקאט איז גרייט צו פאָרשלאגן טערמינען וואס זענען אקצעפטירבאר פאר די חרדי'שע פארטייען, לויט ווי דער פאליטישער קאמענטאטאר ישי כהן גיט איבער.

"יהדות התורה וויל גיין מיט אייזנקאט און זיין חבריא," האט כהן געזאגט ביי א פאנעל אויף 'קאנאל 12'. "די פראגע איז נאר צי עס איז דא א שותף אויף די אנדערע זייט. יעצט זעט אויס אז דער ענטפער איז ניין."

די מעגליכקייט איז נישט בלויז א טעאריע. אייזנקאט האט שוין פארגאנגענעם חודש געמאלדן אז ער איז גרייט צו קאאפערירן מיט די ספרד'ישע 'ש"ס' פארטיי אויב זיי וועלן אקצעפטירן זיינע הויפט פרינציפן, וואס דאס צייגט אז ער רעכנט נישט אויס די חרדי'שע פארטייען אלס מעגליכע קאאליציע שותפים.

דער צענטראלער שטרויכלונג בלייבט אבער די האקעלע אישו פון 'גיוס בני הישיבות'. אייזנקאט האט לעצטנס אנגענומען א גאר שטרענגע פאזיציע איבערן חרדי'שן גיוס, זאגנדיג דעם חודש אז עס וועט נישט זיין "קיין שום קאמפראמיס" איבערן איינשטעלן א מיליטערישע אדער ציווילע סערוויס פליכט פאר אלע בירגער. לויט אים, וועלן בלויז ארום 3 פראצענט - אויסערגעווענליכע עילויים אין תורה און אנדערע פעלדער - באקומען א פטור פון מיליטער, און ער האט אנגעצייגט אז אומאייניגקייטן איבער דעם ענין קען זיין גענוג ערנסט צו פירן צו א פאל פון א צוקונפטיגע רעגירונג.

די דאזיגע פאזיציע לאזט איבער א ריזיגע לאך צווישן אייזנקאט און די חרדי'שע פירערשאפט. דאס קומט אין די צייט וואס פאליטישע שפילערייען בעפאר די וואלן ברענגען ארויף פראגעס צי די טראדיציאנאלע בונד פון די חרדי'שע פארטייען מיטן פרעמיער מיניסטער בנימין נתניהו'ס רעכטן בלאק וועט ווייטער אנגיין אומגעטוישט.