דער מעמד, וואס וועט נאך לאנג געדענקט ווערן ביי אלע אנוועזנדע, איז אפגעראכטן געווארן דורך די בארימטע 'קרן הצלה' ארגאניזאציע, וואס דינט אלס דער הויפט אגענטור צו שטיצן און אויפהאלטן די הייליגע מוסדות החינוך אין ארץ ישראל וועלכע ווערן געפירט ריין "על טהרת הקודש" אן צו נעמען קיין שום פינאנציעלע שטיצע אדער בודזשעטן פון די ציוניסטישע רעגירונג. ביי דעם יעצטיגן חלוקה, וואס איז באגלייט געווארן מיט אומגעהויערע התרגשות, איז אראפגעלייגט געווארן אויפן טיש פונעם גאב"ד שליט"א די אסטראנאמישע סומע פון 5 מיליאן דאלאר ארויסצוהעלפן און ווערן פארטיילט פאר די געטרייע מנהלים וועלכע פלאגן זיך אזוי שווער א גאנץ יאר אנצוהאלטן די מוסדות

דער מאמענט האט דערגרייכט א קלימאקס ווען עס איז אנגעקומען צום געהויבענעם אסיפה דער חשוב'ער יושב ראש פון 'קרן הצלה', הרה"ח ר' שלמה יוסף וואלדמאן הי"ו, וועלכער האט גענומען די טירחה און ספעציעל אפגעפלויגן פון אמעריקע קיין ארץ ישראל זיך צו באטייליגן ביי דעם חלוקה און עס פערזענליך איבערגעבן. גלייך ביים לאנדן אינעם בן גוריון לופטפעלד, אן זיך אפילו אפרוען פונעם לאנגן רייזע, האט ער זיך תיכף ומיד ארויסגעלאזט אויפ'ן וועג צום גאב"ד'ס שטוב אין הר נוף. 

דער גאב"ד שליט"א, זעענדיג דעם געוואלדיגן מסירות נפש פון די נדיבים בעם, האט רעאגירט מיט גרויס התרגשות און פיל געפיל. מיט א ווארעמע שטימע האט דער רב ארויסגעזאגט ברכות לרוב פאר די תומכים, זאגנדיג אז דער אייבערשטער זאל זיי געבן סייעתא דשמיא, הצלחה און אסאך אידיש נחת, און אז אין אלע זייערע אונטערנעמונגען זאלן זיי זען ברכה. דער פוסק הדור האט ספעציעל ארויסגעברענגט וויפיל נחת רוח דאס מאכט אויבן אין הימל, ווען אידן עפענען אויף זייערע הערצער און טאשן זיך אנצונעמען פאר אזא הייליגע צוועק. דערצו האט ער צוגעלייגט זיין וואונטש אז בזכות די גרויסע מצוה זאל דער באשעפער אונז עפענען די שערי רחמים, און מיר זאלן אלע בקרוב ממש זוכה זיין אקעגנצוגיין משיח צדקינו במהרה

אינמיטן דעם מעמד איז צוגעטרעטן צו בקודש פנימה דער באקאנטער ספרא דדיינא פון די עדה החרדית, הרה"ח ר' יצחק שלמה בלויא הי"ו. מיט א ספעציעלע רשימה אין האנט, האט ער פארגעלייגט פארן גאב"ד די פונקטליכע נעמען פון די אלע נדיבים און שותפים וועלכע האבן זיך געלאזט קאסטן און בייגעשטייערט די ריזיגע סומעס צו ערמעגליכן די יעצטיגע חלוקה. מרן הגאב"ד האט זיך פארטיפט אין די נעמען און געוואונטשן פון טיפן הארצן אז בזכות זייער צדקה זאלן זיי זוכה זיין צו אלע ברכות האמורות בתורה. ער האט אינזין געהאט יעדע פרט, און צוגעזאגט ברכות פאר שפע, פרנסה, גוטע זיווגים און ערליכע קינדער, אנוואונטשנדיג דערביי ווארעם אז אלע זייערע קינדער זאלן אויסוואקסן גרויסע תלמידי חכמים און געבן נחת פאר זייערע עלטערן

ביים קלימאקס פונעם צוזאמקום האט דער יושב ראש, ר' שלמה יוסף וואלדמאן, אויפגעטרעטן מיט קורצע אבער פלאמעדיגע ווערטער. ער האט ארויסגעהויבן די זכיה וואס כלל ישראל האט, אז דער מרא דארעא קדישא נעמט זיך אן מיט אזא געוואלדיגע איבערגעגעבנקייט פאר דעם קיום פון קרן הצלה און באגלייט זייערע פראיעקטן דורכאויס די יארן. ר' שלמה יוסף האט שיין מדגיש געווען אז דער יעצטיגער מעמד קומט פאר ספעציעל אין די טעג ארום די גרויסע יומא דהילולא פון  הרה"ק מסאטמאר זיע"א, דער גרינדער פון די שיטה טהורה און דער לייגער פון די יסודות פאר דעם עצם געדאנק פון 'קרן הצלה'. 

 צום באמערקן, די קרן צעטיילט בערך זיבעצן מיליאן דאלאר יערליך אריינצובלאזן לעבנס אטעם אין די מוסדות וואס האלטן זיך פעלזן פעסט נישט צו נעמען קיין שום  שטיצע משלטון הכופרים

צווישן די אנגעזעענע פערזענליכקייטן וואס האבן באשיינט דעם ענגן אבער געהויבענעם מעמד האבן זיך אנגעזען באקאנטע עסקנים און רבנים, אריינגערעכנט הרה"ח ר' וועוועל אשכנזי מראשי הנהלת העדה החרדית, הרה"ח ר' גדליה פויגל חבר הנהלת קרן הצלה, הרה"ח ר' חיים ראטה יו"ר ועד החינוך, הרה"ח ר' שמחה אנשין דער געטרייער מזכיר פון קרן הצלה, ווי אויך עטליכע חשוב'ע מנהלי המוסדות ווי הרה"ח ר' אברהם ברגמן פון סמינר 'בנות שפרינצא' און הרב אליהו נהרי פון די ישיבה התימנית, צוזאמען מיט נאך פילע אנדערע נכבדים. די געטרייע מנהלים האבן פארלאזט דעם צדקת פזרנו מעמד מיט טרערן פון רגש און טיפע הכרת הטוב צו די ראשי הקרן פארן צושטעלן די וויכטיגע לופט צו אטעמען. זיי האבן געשפירט א פרישע חיזוק און באקומען א נייעם כח ממשיך צו זיין מיט זייער הייליגע און גאר שווערע ארבעט פון אוועקשטעלן דעם קומענדיגן דור אויף די ריינע יסודות התורה והיראה בארץ הקודש, קלאר און אן קיין פשרות.