שרעקליכע פליצלינגדיגע פארפלייצונג אין נעפאל לאזט איבער כאאס און חורבות; הונדערטער טוריסטן געשטראנדעט

א שרעקעדיגע ווידעא וואס איז פארשפרייט געווארן פון 'מאטשאקאלא' אין די 'גארקא' דיסטריקט אין נעפאל, צייגט ווי מאסיווע בלאטע-וואסערן רייסן אדורך דעם 'בודי גאנדאקי' טאל, שלעפנדיג מיט זיך ריזיגע שטיינער ווי גלייך זיי וואלטן גארנישט געוואויגן. די פליצלינגדיגע פארפלייצונג האט פאסירט ארום 4 אזייגער פארטאגס לאקאלע צייט, דעם 11'טן אקטאבער, און האט מיטגעשלעפט בלאטע און ברוכווארג דורכאויס א פאפולערע ראיאן וואו אסאך טוריסטן קומען שפאצירן.

לאקאלע אויטאריטעטן געבן איבער אז די וואסערן האבן אוועקגעשוועמט ארום א צענדליג הייזער, צוויי הענגעדיגע בריקן, און א הייוועי בריק, ווי אויך האט עס פארניכטעט א לאקאלע 'היידרא-פאוער פראדזשעקט' קעמפ. אמווייניגסטנס פינף מענטשן זענען באריכטעט אלס פעלנדיג. די ארמיי זאגט אז זיי האבן באוויזן צו ראטעווען 49 פערזאנען, און לאקאלע באאמטע זאגן אז איבער 100 אויסלענדישע טוריסטן זענען געבליבן געשטראנדעט אן קיין וועג ארויס.

וואס האט געפירט צו די מאסיווע פארפלייצונג?

לויט ערשט-האנטיגע באריכטן קוקט אויס אז א מאסיווע ערד-גליטש (לענדסלייד) נעבן די שטאט טשומטשעט האט אויף א קורצע צייט פארהאקט דעם טייך, און ווען די וואסער האט ענדליך דורכגעבראכן די בלאקאדע האט עס געפירט צו די שרעקליכע רעזולטאטן, כאטש די פונקטליכע אורזאך איז נאכנישט אפיציעל באשטעטיגט געווארן. באריכטן לייגן אראפ אז עס איז געווען א "טרוקענע ערד-גליטש" וואס איז נישט געקומען אלס רעזולטאט פון רעגן, און טייל עקספערטן זאגן אז עס קען זיין אז א גלעטשער אדער אן אייז-און-שטיין בלאק האט עס פאראורזאכט.

די יעצטיגע קאטאסטראפע קומט קוים זיבן וואכן נאך אן אנדערע שרעקליכע פארפלייצונג אין ראסווא, וואס איז געווען די טויטליכסטע נאטורליכע קאטאסטראפע וואס נעפאל האט געזען זינט די שרעקליכע ערדציטערניש אין יאר 2015. מיט די שפיציגע בערג און אומסטאבילע ערד אין דעם ראיאן, קענען טייכן וואס ווערן בלאקירט דורך אן ערד-גליטש ארויסלאזן ריזיגע כוואליעס פון וואסער און שטיינער כמעט אן קיין שום פריערדיגע ווארענונג, וואס לאזט איבער גאר ווייניג צייט פאר די איינוואוינער אין די שמאלע טאלן זיך צו ראטעווען דאס לעבן.