היסטארישע 'קרן עולם התורה' קאמפיין ברייטערט זיך אויס: 30,000 סעמינאר מיידלעך נעמען אנטייל אינעם מאסיוון פאנדרעיזינג אפאראט

א ריזיגע פאנדרעיזינג אקציע לטובת דעם עולם התורה אין ארץ ישראל האט זיך דראסטיש פארברייטערט, ווען די ארגאניזירער פונעם 'קרן עולם התורה' קאמפיין געבן איבער אז 30,000 סעמינאר מיידלעך פון 80 סעמינארן נעמען יעצט אנטייל אינעם מאסיוון פראיעקט.

די פרישע ציפערן צייגן א מאסיווע וואוקס פונעם קאמפיין, נאכדעם וואס אין די ערשטע פאזעס האבן אנטיילגענומען ארום 20,000 מיידלעך.

קאל סענטערס וואס זענען אויפגעשטעלט געווארן אין ירושלים, בני ברק און מודיעין עילית זענען אין פולן שוואונג, בשעת טויזנטער אנטיילנעמער קלינגען אן אידן איבער גאנץ ארץ ישראל און אין חוץ לארץ צו בעטן זייער שטיצע. אסאך פון די מיידלעך האבן זיך אונטערגענומען פערזענליכע פאנדרעיזינג צילן אלס א טייל פונעם געמיינזאמען אקציע.

לויט די אפיציעלע ציפערן וואס זענען ארויסגעגעבן געווארן דורך די קאמפיין פירער, איז שוין ביז יעצט אויפגעטריבן געווארן מער ווי 20 מיליאן שקל.

דער ציל פונעם קאמפיין איז צו פארשטארקן די פינאנציעלע שטיצע פאר ישיבות און כוללים איבער גאנץ ארץ ישראל. די עסקנים געבן איבער אז דער ברייטערער 'קרן עולם התורה' פראיעקט שטיצט אצינד ארום 130,000 אברכים און בחורים וואס לערנען אין 1,589 ישיבות און כוללים.

די פרישע סטאטיסטיקס פונעם קאמפיין צייגן אז מען האט שוין באקומען צוזאגן פאר ארום 10.88 מיליאן דאלאר א חודש, אבער די ארגאניזירער זאגן אז מען ברויך נאך האבן אן עקסטערע 12 מיליאן דאלאר א חודש צו קענען דעקן דעם פולן בודזשעט און דערגרייכן דעם ציל.

גדולי ישראל זענען אויך געקומען באזוכן די קאמפיין צענטערן אין די לעצטע טעג, צו געבן חיזוק פאר די טויזנטער וואס זענען פארנומען מיט די הייליגע ארבעט.

די פרישע ציפערן פון די אנטיילנעמער און די סומעס וואס זענען שוין געשאפן געווארן באצייכענען א נייע פאזע אין די היסטארישע אקציע, נאך די מאסיווע מאביליזאציע וואס איז באריכטעט געווארן אנהייב וואך, בעת דער קאמפיין גייט אן אין פולן קראפט יעצט אין די טעג בעפאר יום כיפור.