פרעזידענט טראמפ מיט פרישע קריטיק אויף זעלענסקי: "ער האט געקענט מאכן א דיעל און ענדיגן די מלחמה"

פרעזידענט דאנאלד טראמפ האט נאכאמאל אויסגעדרוקט זיין אומצופרידנהייט מיט'ן אוקראינישן פרעזידענט וולאדימיר זעלענסקי. אין א נייע ווידעא קליפ וואס איז יעצט ארויסגעקומען, הערט מען ווי טראמפ זאגט אז זעלענסקי דארף אפהאלטן פרישע עלעקשאנס, און ער טענה'ט אז זעלענסקי האט געהאט עטליכע געלעגנהייטן צו ענדיגן די מלחמה מיט רוסלאנד אבער ער האט עס פשוט נישט אויסגענוצט.

"ער האט געקענט סאלוון די מלחמה און ער האט געקענט מאכן א דיעל אסאך מאל," האט טראמפ געזאגט, איבערחזר'נדיג זיין קריטיק וואס ער ווארפט שוין פאר חדשים לאנג אויפ'ן אוקראינישן פירער. די קאמענטארן קומען אין א צייט וואס וואשינגטאן לייגט ווייטער דרוק צו קומען צו א פארהאנדלטע ענדע צום קאנפליקט, און טראמפ נוצט זעלענסקי'ס אנטזאג צו רופן פאר עלעקשאנס אלס א טייל פון די פראבלעם וואס האלט אויף א רעזאלוציע. דאס איז נישט דאס ערשטע מאל וואס טראמפ ברענגט ארויף דעם אישו אין פובליק, און יעדע מאל וואס ער רעדט דערפון לייגט עס צו פרישע פאליטישע פרעשור אויף קיעוו.

טעכניש איז זעלענסקי'ס פרעזידענטליכע טערמין שוין אפגעלאפן אין 2024, אבער קיין וואלן זענען נישט פארגעקומען וויבאלד אוקראינע געפינט זיך נאך אלץ אונטער 'מארשאל לאו' (מיליטערישע געזעץ) זינט די רוסישע אינוואזיע אין 2022. קיעוו טענה'ט אז דאס איז א לעגאלע און פראקטישע אפהאלט וואס מאכט אן עלעקשאן אינמיטן א מלחמה אומזיכער און אוממעגליך דורכצופירן.

דאך, האלט טראמפ'ס פרישע פאדערונג די פראגע איבער זעלענסקי'ס לעגיטימקייט אין די נייעס. דאס איז אגב א פונקט וואס דער רוסישער פרעזידענט וולאדימיר פוטין נוצט אויך אלס א תנאי פאר סיי וועלכע שלום אפמאך. אוקראינישע באאמטע האבן שוין אנגעדייט אז זיי זענען אפן צו אפהאלטן עלעקשאנס עווענטועל, אבער נאר אויב זיי באקומען פעסטע זיכערהייט גאראנטיען פון אמעריקע און די אייראפעאישע אליאירטע, צוליב די מורא אז א וואלן פראצעס אינמיטן א מלחמה קען ווערן אויסגענוצט אדער ברענגען אומסטאביליטעט.

דערווייל וואס די געשפרעכן פאר א פייער-אפשטעל רוקן זיך נישט, בלייבט די עלעקשאן פראגע איינע פון די מערסט קאנטראווערסיאלע אישוס צווישן וואשינגטאן און קיעוו.