ב"ה

וַיַּקְרִיבוּ נְשִׂיאֵי יִשְׂרָאֵל רָאשֵׁי בֵּית אֲבֹתָם

אשרי מי שבא לכאן! נעכטן ליל שישי אמור, לס' להזהיר גדולים על הקטנים, איז אפגעהאלטן געווארן א גאר באַדייטפולער צוזאַמקום, ווען די חשובי פּני העדה דק"ק קרית יואל, די פּארי וזקני הקהלה וראשי בית אבות, זענען זיך צונויף געקומען לפּונדק אחד. אַלעס פאר איין ציל, צו פאַרזיכערן די המשכת הדורות פון אונזערע קינדער און אייניקלעך בקרית מלך רב קרית יואל. אויף די פערזענליכע בקשה פון כבוד הגה"צ אבד"ק ור"מ שליט"א.

עס איז געווען א ערהאבן בילד צו זעהן די השתתפות פון די חשוב'ע פּארי הקהלה וואס האָבן זוכה געווען מיטצוהאַלטן בהלו נרו על ראשינו ווען מרן רביה"ק זי"ע האָט מיט זיין הייליגע שאיפה און רצון מייסד געווען עיר הצדק ונאמנה, ווען דאָס איז געשטאַנען פאר זיינע הייליגע אויגן על אדמת אַמעריקע, אַז קהל עדת צאן מרעיתו זאָלן האָבן אַן אייגן ערליך ווינקל, אָפּגעזונדערט פון די גאַס, און דאָ זאָל מען מחנך זיין די דורות נאמנים לד' ולתורתו. און אט די חשוב'ע פּני הקהלה האָבן מיטגעהאַלטן את כל התלאות אשר מצאתנו עלי אורך הדרך, די שווערע מושטענישן אין שטאָט ביז ווען ס'איז געוואָרן מסודר אַלע רוחניות'דיגע אַנגעלעגנהייטן. מ'האָט מיטגעלעבט די שווערע יאָרן ווען מ'האָט געמוזט ווידער מייסד זיין קהלתינו הקדושה, אַלעס פאַר'ן איינעם ציל, אַז די דורות הבאים זאָלן זיך קענען האַלטן ערליך און געטריי צום הייליג דרך וואָס מיר האָבן מקבל געווען מבית מדרשו של רבי.

די אסיפה פאר זיך איז א עדות צו די וואונדערליכע עלי׳ אין די קהלה, נעמליך די אסיפה איז נישט געווען בלויז לשם זיך צוזאמנעמען, ס׳איז געווען לכתחילה א צוועק פון עסקנות ביטע פאר די עלטערע דור, און אויף דעם אליין האבן זיך צוזאמגענומען אזא הערליכער שיינער ציבור ראשי בית אב.

עס איז געווען די שענסטע בילד צו זעהן ווי די זקני וחשובי פארי הקהלה, תלמידי וחסידי רביה"ק זי"ע, גייען אריבער פערזענליך ביי הגה"צ דער רב שליט"א, איבערגעבן זייער שטר קבלה וואס זיי האבן גענומען אויף זיך גרעסערע צילן וואס זיי וועלן שאפן ביים היסטארישן "כוננהו" קאַמפּיין, ביום א' וב' במדבר הבעל"ט. צו אינאיינעם אַרבעטן אויפצוטרייבן די פאָנדן אַז די קהלה זאל האָבן אַ לעכטיגע המשכה און קיום אויף ווייטער.

ווייל די חשוב'ע ראשי בית אב צוזאַמען מיט די קינדער פאַרשטייען און באַגרייפן, אַז יעצט טאַקע ביי אָט דעם קאַמפּיין, איז אָנגעוואָנדן די אַלע שווערע האָרעוואַניע פון אַזויפיל יאָרן, אַז דאָס זאָל האבן אַ המשכה און ריכטיג ווערן שטאַנדהאַפטיג מיוסד און מכונן!

די נעכטיגע אסיפה האט ווידעראמאל באוויזן די פייער און פלאקער וואס נעמט ארום "אלע תושבי קרית יואל רבתי", זקנים עם נערים צוגלייך, וואס לעכצן צו זעהן די הייליגע קהלה, וואס האט אין געציילטע יארן אויפגעבליעט, זאל האבן א קיום לעד ולנצח!

וְאֵת כׇּל־הָעֵדָה הִקְהִילוּּ עַל־מִשְׁפְּחֹתָם לְבֵית אֲבֹתָם