בקהילה קדושה פאפא אין מאנסי האט דער רבי שליט"א געלאזט פאררופן אן אסיפה כללית, וואו דער רבי שליט"א האט אויפגעפאדערט אז דער ציבור זאל ארויסהעלפן סטאביליזירן די מצב המוסדות.

די פאפא מוסדות אין מאנסי וואס דער רבי האט געגרינדעט אין שנת תשמ"ט, איז שטארק חביב אויפ'ן הארצן פון רבי'ן, זייענדיג איינע פון די ערשטע מוסדות וואס דער רבי האט געגרינדעט אין די ערשטע יארן וואס ער איז ארויף דינען על כס ההנהגה והאדמורו"ת לבית פאפא.

די מוסדות האט דער רבי גערופן צאן יוסף און שפעטער אויך געגרינדעט די ישיבה קטנה ויחי יוסף על שם קדשו פון זיין הייליגן טאט'ן דער בעל ויחי יוסף זצוק"ל.

די אומגעהויערע שנעלע וואוקס פון די פאפא קהילה אין שטאט, ווען עס האבן זיך אין די לעצטע יארן געעפענט פילע נייע שטיבלעך, און אויך האט די קהילה אויפגעבויעט א גיגאנטישע ביהמ"ד אין צענטער פון שטאט, האט יעצט אויך אויסגעקלאפט אויף די מצב המוסדות, וואס איז נישט געווען געבויעט גענוג שטארק פינאנציעל צו קענען דערהייבן אזא שנעלע וואוקס, ובפרט אין די לעצטע תקופה ווען דער רבי האט געגעבן אן הוראה אז מ'זאל צוטיילן די איבערגעפילטע קלאסן און עפענען א דריטע פערעראל קלאס אין חדר.

דער רבי האט דעריבער אונטערגענומען א מגבית קודש, וואס צילט צו שטעלן די פינאנצן פון די מוסדות צוריק אין פלאץ און אפצאלן אלע חובות.