תאיר כאור יום חשכת לילה!

ליכטיגקייט שיינט אויף אין נייעם גיגאַנטישן בנין הבית רחל, ערב המעמד ״אדיר וחזק״, נאָך וואָס O&R פאַרבינדט עלעקטריציטעט קראַפט באישון לילה. גאנצע נייע י.ד. ג"ב ראוד אויפן שטח החדש היינט געגאסן בשעטו"מ!

ויאמר אלקים יהי אור, ויהי אור:

אויסטערלישע סייעתא דשמיא נאך ריינע הארציגע תפילות פון תינוקות של בית רבן

אין א גאר פריידיגע אנטוויקלונג אין דעם בוי-פּראיעקט פונעם בנין הבית רחל החדש, האט דער נייער בנין ב״ה דעם היינטיגן דאנערשטאג אינדערפרי ערהאלטן די עלעקטעריציטעט קראפט צו באלייכטן דעם גאנצן 100,000 סקווער-פיס פעסטונג!!!

אין די לעצטערע וואכן האט זיך די הנהלת המוסדות און וועד להקים זיך דערזעהן זיך מוטשען מיט גאר שטארקע שווערקייטן צו ברענגן עלעקטעריציטעט קראפט צום ריזן בנין האדיר, נאכדעם וואס די O&R פירמע האט אנגעפאנגן מאכן פראבלעמען און ארומשלעפן מיט די הנהלת המוסדות - ווי ליידער גוט באקאנט פאר תושבי קרית יואל זייער צוגאנג צום היימישן ציבור אין אונזער געגנט.

דער געטרייער מנכ"ל ר' משה אלי', זיך דערזעענדיג אין א מצב אן קיין וועג ארויס, האט "דעם מאנטאג כי תצא" געבעטן פון די מנהלי המוסדות אז מען זאל מתפלל זיין אינאיינעם מיט די תלמידים צו זעהן א ישועה בקרוב, און שוין היינט פארטאגס "בלויז צוויי טעג שפעטער" איז דא לעקטער אינעם גאנצן בנין!

במשך די גאנצע נאכט האט די O&R פירמע געארבעט אויפ׳ן ״קאננעקטן עלעקטעריציטעט״ צום בנין האדיר החדש ״בנין גאלדבערגער״ אין קרית יואל.

די ארבעט איז געטון געווארן אין פינסטערניש פון די נאכט פון 2:00 אויפדערנאכט ביז 6:00 פארטאגס, דאס איז א באזונדערע סייעתא דשמיא ווייל דורכאויס די ארבעט מוז פארלאשן ווערן די “מעין״ פונעם ערשטן בנין הבית רחל וואו די טויזנטער תלמידות ווערן נתחנך, און די ארבעט אין די נאכט שטונדען האט געברענגט אז מען האט נישט געדארפט שטערן דעם טאג-טעגליכן סדר היום אפי' איין טאג אויך נישט.

דורכאויס די גאנצע נאכט ביזן זון אויפשיין איז מיט א געטריישאפט און מסירת נפש געשטאנען דער געטרייער עסקן נמרץ הר״ר יצחק אייזיק וואלטער הי״ו, יו״ר ועד קרן הבנין להקים, העומד בראש מלאכת הבני׳, וועלכער האט אריינגעלייגט אין דעם כל כוחו ואונו עס צו מאכן פאסירן, ולא נתן שינה לעינו ביז ווילאנג ס׳איז ב״ה געקומען די גוטע בשורה ״ויהי אור״!

אין זעלבע צייט דארף דערמאנט ווערן די שטארקע כח השתדלנות פון ידידינו ר' אייזיק הי"ו, וואס האט אין די לעצטערע וואכן איבערגעדרייעט יעדע איינציגסטע שטיינדל אינעם דרך הטבע'דיגע השתדלות צו מאכן זיכער אז די פירמע קומט אראפ צום שטח, ודבריו עושים פירות, יהא ה' עמו ובכל אשר הוא עושה ה' מצליח בידו!

דאס באקומען עלעקטריציטעט איז פון די שווערסטע חלקים פונעם בויען אזא ריזן בנין, און ס׳איז ב״ה א מורא׳דיגע עררייכונג אין וועג צו קענען באנייען דעם בנין אויף קומענדיגן ראש חודש חשון הבעל״ט!

עס קומט פונקט בעתו ובזמנו ערב דעם גרויסן ״מעמד אדיר וחזק״ היינטיגן דאנערשטאג נאכט אינעם בנין בית רחל החדש וואו הורי קרית יואל וועלן זיך פארזאמלען כאיש אחד ובלב אחד למען דורותינו, צו באלייכטן אונזער עתיד לדורות יבואו!

המאיר לארץ ולדרים עליה!