מער ווי 1,000 בחורים פון איבער 25 ישיבות נעמען אנטייל אינעם יערליכן "הליקוט" פראגראם, אן איניציאטיוו אנגעפירט דורך דעם "ועד התמימים" וואס שטיצט און מוטיגט בחורים קונה צו זיין א גאנצע חלק פון די באקאנטע "לקוטי שיחות".

דער פראגראם שטעלט צו א מסודר'דיגע ראם פאר די באטייליגטע זיך אריינצוטון און לערנען בעיון די שיחות פונעם ליובאוויטשער רבי'ן. די השפעה פונעם פראגראם גייט אבער פיל ווייטער ווי די פיר ווענט פון די ישיבה, און אין אסאך פעלער האט עס א דירעקטע ווירקונג אויף גאנצע משפחות.

דער "ועד התמימים" האט מיטגעטיילט עטליכע ביישפילן פון די געוואלדיגע השפעה. אין איין פאל האט א בחור וואס נעמט אנטייל אין "הליקוט" אנגעהויבן רופן אהיים איבערצוחזר'ן א שיחה מיט זיין טאטן. ווי די שמועסן האבן אנגעהאלטן, האט דער טאטע אליינס אנגעהויבן עפענען דעם לקוטי שיחות אינדערהיים צו קענען מיטצולערנען און אנטיילנעמען אין די שמועסן.

אן אנדערע משפחה האט דערציילט איבער דעם רושם וואס זייער זון'ס התמדה און ברען האט איבערגעלאזט אויף די קלענערע געשוויסטער ווען ער איז אהיימגעקומען פון ישיבה אויף אן "אף-שבת" (פרייע שבת), ווען די קלענערע קינדער האבן מיטגעהאלטן זיין קאכעניש אין לערנען און זיין התקשרות צום רבי'ן.

"הליקוט" איז בלויז איינס פון עטליכע פראגראמען וואס ווערט אנגעפירט דורך ועד התמימים פאר ליובאוויטשער בחורים. אן אנדערע פראגראם, "הנחות", האט אריינגעצויגן נאנט צו 1,000 בחורים וואס האבן אינאיינעם אפגעגעבן איבער 200,000 מינוט צו קוקן די פארברענגענס פונעם רבי'ן און דערנאך אראפשרייבן און מסביר זיין וואס זיי האבן געלערנט אין זייערע אייגענע ווערטער.

דערצו ארגאניזירט דער ועד התמימים פארשידענע פראגראמען און פארברענגענס ארום וויכטיגע יומא דפגרא'ס אינעם חב"ד קאלענדאר, און שטעלט צו שטיצע פאר תלמידים השלוחים און אנדערע בחורים.

די ארגאניזאציע גיט איבער אז די אלע פראגראמען זענען ספעציעל אויסגעשטעלט צו פארשטארקן די באטייליגטע אין לימוד התורה, חסידישקייט און התקשרות, וואס ווי דערמאנט, ציט זיך די השפעה אפטמאל פונעם יחיד ביז אריין אין זיין משפחה און שטוב.