בס"ד

שוידערליכע דעשקעם ווידעא צייגט דעם מאמענט וואס א קליינע קאר קראכט אריין אין א מאסיווע טראק און פליט אין די לופטן

א נייע ארויסגעגעבענע דעשקעם ווידעא דורך די קאליפארניע הייוועי פאטראל (CHP) צייגט דעם שוידערליכן מאמענט ווי א ווייסע 'אקיורא אינטעגרא' קאר פארלירט קאנטראל אויף א קרומע וועג און קראכט אריין אין די זייט פון א מאסיווע טראק וואס האט געשלעפט צוויי אנגעפילטע טרעילארס מיט זאמד און שטיינער, און דרייט איבער דעם גאנצן טראק אויף די זייט.

דער שרעקליכער עקסידענט האט פאסירט דעם 9'טן סעפטעמבער ארום 11:30 אינדערפרי אויף סטעיט רוט 33 ביי קאלינגא-מענדאטא ראוד, נאכדעם וואס די קליינע קאר איז אריבערגעפארן די געלע ליניע אריין אין די קעגנזייטיגע טראפיק. דער קראך איז געווען אזוי מעכטיג, אז די קליינע קאר איז געפלויגן אין די לופטן פאר'ן לאנדן אויפן זייט פונעם שאולדער, בעת דער גרויסער טראק מיט די טרעילארס האבן זיך איבערגעדרייט, אויסגיסנדיג די גאנצע לאסט און א גרויסע מאס דיזל ברענשטאף איבער די הייוועי.

דער עקסידענט האט געפירט דערצו אז די הייוועי איז געווען פארמאכט פאר ארום זיבן שעה, בשעת קלינאפ אגענטורן האבן געארבעט אפצורוימען די ברוכווארג און די אויסגעגאסענע אויל.

דער דרייווער פון די קאר האט געליטן ערנסטע וואונדן און איז אפגעפירט געווארן מיט א העליקאפטער צום 'קאמיוניטי רידזשינאל' שפיטאל אין פרעזנא, קאליפארניע, בשעת דער טראק דרייווער איז ארויס מיט בלויז לייכטע וואונדן און איז אפגעפירט געווארן צו א לאקאלע שפיטאל. די הייוועי פאטראל האט שפעטער באשטעטיגט אז ביידע זענען ברוך השם נישט אין א לעבנס-געפאר, און אין אן אפדעיט א וואך שפעטער האבן זיי געמאלדן אז דער קאר דרייווער ערווארט זיך אינגאנצן צו ערהוילן.

אינוועסטיגעיטארס זאגן אז לויט די ערשטע אויספארשונגען זעט אויס אז די קאר איז אריינגעפארן אינעם טראק'ס לעין, אבער די פונקטליכע אורזאך פונעם קראך ווערט נאך ווייטער אויסגעפארשט.

די דראמאטישע ווידעא האט געצויגן גרויס אינטערעסע אויפן אינטערנעט, וואו טויזנטער מענטשן האבן באוואונדערט די מעכטיגע קראפט פונעם קראך, און דעם פאקט אז די אונטערשטע טייל פון די קאר איז געבליבן כמעט אינגאנצן גאנץ טראץ דעם שרעקליכן צוזאמענשטויס.