היסטארישע 'כינוס השלוחים' אין טייוואן צייכנט אפ 40 יאר פון חב"ד אקטיוויטעטן אין אזיע

טייפעי, טייוואן. – 75 חב"ד שלוחים וועלכע רעפרעזענטירן 15 לענדער האבן זיך פארזאמלט אין טייפעי, טייוואן, פאר א ראיאנישע 'כינוס השלוחים' אפצוצייכענען פערציג יאר זינט חב"ד האט אנגעהויבן אירע אקטיוויטעטן און געגרינדעט א שטענדיגע אנוועזנהייט אין די ווייטע מזרח-אזיע לענדער.

די גרויסארטיגע צוזאמקום האט צוזאמענגעברענגט שלוחים וואס דינען די אידישע קהילות איבער גאנץ אזיע. דער היסטארישער מיילשטיין גייט צוריק צו פערציג יאר צוריק, ווען הרב מרדכי אבצון איז אנגעקומען קיין האנג קאנג אלס דער ערשטער חב"ד שליח אין דעם ראיאן. היינט צו טאגס האט זיך די חב"ד נעצווערק צעוואקסן פון איין איינציגע לאקאציע צו אן אימפעריע פון ארום 60 צענטערן. די שלוחים פירן אן מיט אידישע שולעס, מקוואות, כשר'ע עסנווארג און קהילה פראגראמען, סערווירנדיג סיי די לאקאלע אידן און סיי די פילע טוריסטן און ביזנעסלייט וואס קומען אן אהין.

א גאר עמאציאנעלע טייל פונעם כינוס איז געווען ווען צענדליגע רבנים האבן אפגעשטאט א באזוך אינעם נייעם אידישן בית החיים אין טייוואן. ביז דעם זומער האבן אידן וואס זענען נפטר געווארן אין טייוואן געדארפט געפירט ווערן קיין אויסלאנד צו קומען לקבורה. דער נייער בית החיים, וואס געפינט זיך ארום 40 מינוט פונעם לאקאלן חב"ד הויז, האט געהאט איר ערשטע לוויה דעם פארגאנגענעם 23'סטן יוני.

ביי די פארזאמלונג האבן די רבנים ארומגערעדט איבער די ווייטערדיגע פלענער צו פארברייטערן די אידישע אינפראסטרוקטור איבער אזיע. מ'האט דורכגעשמועסט וויכטיגע טעמעס ווי חינוך, סעקיוריטי, כשרות, עמערדזשענסי פעלער, און די טעגליכע טשאלענדזשעס מיט וואס די שלוחים ספראווען זיך אין אזעלכע אפגעזונדערטע ערטער.

טייוואן אליינס האט מיטגעמאכט א ריזיגע וואוקס אין די אידישע קהילה. ווען דער ארטיגער שליח, הרב שלומי טביב און זיין פרוי רחלי, זענען אנגעקומען קיין טייפעי אין יאר 2011, האבן זיי געהאט קאנטאקטן מיט קוים 70 אידן. היינט שאצן זיי אז ארום 1,500 אידן וואוינען איבערן אינזל.

דורכאויס דעם כינוס איז אויך געמאלדן געווארן א נייע איניציאטיוו — דער "דזשעפרי שווארץ אזיע פאנד" — וואס וועט פינאנצירן נייע חב"ד הייזער, פרישע שלוחים, מקוואות און אנדערע וויכטיגע פראדזשעקטן איבערן ראיאן.

די קאנפערענץ האט זיך געשלאסן מיט פייערדיגע ריקודין דורך די פארזאמלטע שלוחים, בעפאר זיי האבן זיך צוריקגעקערט צו זייערע קהילות איבער אזיע צו אנגיין מיט זייער הייליגע ארבעט.