דער ריבניצער רבי, הרה"ק רבי חיים זאנוויל אבראמאוויטש זצוק"ל, האט נישט געהאט קיין גרינג לעבן. דער רבי איז געבוירן געווארן אין יאר תרס"ב אין באטאשאני, רומעניע, צו זיין פאטער רבי משה אבראמאוויטש, וועלכער איז געווען א חסיד פון הרה"ק ר' אברהם מתתי' פריעדמאן זצוק"ל, אדמו"ר משטעפענעשט. דער שטעפענעשטער רבי האט געהייסן אברהם נאך זיין גרויסן זיידן, רבי אברהם המלאך, דער זון פון הייליגן מעזריטשער מגיד זצ"ל, און מתתיהו האט ער געהייסן ווייל ער איז געבוירן געווארן זאת חנוכה. רבי אברהם מתתי' איז געווען א זון פון הרה"ק רבי מנחם נחום [פריעדמאן] זצ"ל משטעפענעשט און אן אייניקל פון הייליגן רוזשינער רבי'ן זי"ע.

די מאמע פונעם ריבניצער, יוטא צפורה, פלעגט אפט באזוכן ביים שטעפענעשטער רבי'ן און פלעגט אים מוטשענען ער זאל איר געבן א ברכה פאר נאך א קינד. זי פלעגט אלץ דערמאנען דעם רבי'ן אז עס זענען שוין פארביי פערצן יאר זינט איר ערשטע קינד, יצחק, איז געבוירן געווארן.

ביי איינעם פון די באזוכן האט זיין מאמע זיך פאראקשנ'ט. "רבי," האט זי זיך אנגערופן, "איך גיי פון דא נישט אוועק ביז דער רבי גיבט מיר א ברכה פאר א קינד!"

ווי דער רבי האט געהערט אירע פארצווייפעלטע געבעטן האט ער איר מבטיח געווען אז נאך יענעם יאר וועט זי זוכה זיין צו נאך א קינד.

די ברכה פונעם רבי'ן איז מקוים געווארן, און שפעטער אין יאר איז צו ר' משה און זיין פרוי געבוירן א זון. זיי האבן דעם קינד א נאמען געגעבן חיים זאנוויל.