עטליכע איינוואוינער פון אינזערע געגענטער האבן זיך לעצטנס אנגעשטויסן אין זייער א קלוגע אָנליין סקעם.

די פאלשע אימעילס זעען אויס פונקט כאילו זיי קומען פון די עכטע אימעיל אקאונטס פון קליענטן, קאסטומערס, אדער מענטשן מיט וועמען מ'איז אין א כסדר'דיגע קאנטאקט וואס דאס מאכט עס גאר שווער צו כאפן אז ס'איז א סקעם.

אנדערש ווי די אלטע שווינדל אימעילס וואס פלעגן קומען פון אומבאקאנטע אדער מאדנע אימעיל אדרעסן, קענען די נייע מעסעדזשעס אנקומען פון אן אימעיל וואס דער מענטש קען שוין און געטרויט.

דער שיקער קען זיין א קליענט אדער א שותף מיט וועמען מ'האט שוין גערעדט פילע מאל, און מ'האט נישט קיין שום סיבה צו חושד זיין אז עפעס איז נישט גוט.

די פאלשע אימעיל קען האבן א לינק אדער א דאקומענט וואס זעט אויס פונקט ווי נארמאל.

וויבאלד סיי די אימעיל אדרעס און סיי דער מענטש קוקן אויס באקאנט, איז זייער גרינג פשוט צו עפענען דעם דאקומענט אן קיין צווייטע מחשבה.

אבער עפענען אזא שעדליכן דאקומענט אדער פאלגן די אנווייזונגען דערין קען ארויסגעבן אייערע פעסווארדס, ביזנעס אינפארמאציע, באנק אקאונטס און אנדערע וויכטיגע דעטאלן.

טייל מאל וועט דער מענטש אפילו נישט גלייך כאפן אז ער איז אריינגעפאלן.

מ'בעט דעריבער יעדן צו זיין גאר פאָרזיכטיג מיט דאקומענטן וואס מ'האט נישט ערווארטעט צו באקומען, אפילו אויב עס קומט פון אן עכטע אימעיל אדרעס פון איינעם וואס מען קען.

אויב עפעס זעט נאר אויס א ביסל אומגעוויינטליך, זאל מען זיך פארבינדן מיט דעם מענטש דורך אן אנדערן וועג ווי אים קלינגען אויפן טעלעפאן צו באשטעטיגן צי ער האט דאס טאקע געשיקט, אדער זיך דורכרעדן מיט א סייבער סעקיוריטי עקספערט.

היות די סקעמערס קענען היינט אזוי גוט נאכמאכן אימעילס אז עס זאל אויסזען ווי עס קומט פון אן עכטן קאנטאקט, איז שוין נישט גענוג צו קוקן נאר פאר שוואכע ענגליש אדער מאדנע אדרעסן.

נעמען נאך איין מינוט איבערצוקלערן פארן עפענען א דאקומענט, אדער פרעגן אן עקספערט ווען מען האט א ספק, קען אייך ראטעווען פון ווערן א קרבן פון א טייערן שווינדל.