אסעמבלימאן אהרן בן ציון ווידער האט זיך לעצטנס אראפגעזעצט מיטן מעיאר פון פיערמאנט, נתן מיטשעל, און טראסטי דזשעף גארדאן.

זיי האבן אינאיינעם דורכגערעדט וואס דאס שטעטל דארף אויף די מינוט דרינגענד האבן, און וויאזוי דער אסעמבלימאן קען זיי ווייטער העלפן פונעם קעפיטאל אין אלבאני.

ביי די מיטינג האט ווידער מיט פרייד געמאלדן אז ער האט באוויזן צו שאפן א פרישע 50,000 דאלאר פון די סטעיט, אפצוקויפן נייע ראדיאס פאר די ארטיגע פאליציי און פייער דעפארטמענטס.

דאס איז גאר וויכטיג כדי די רעטונגס ארבעטער זאלן קענען געהעריג קאמוניקירן צווישן זיך ביי אן עמערדזשענסי, און צו מאכן זיכער אז יעדער בלייבט זיכער.

דערנאך האט מעיאר מיטשעל אנגעוויזן א צווייטע פראבלעם:

עס פעלט זיך קריטיש אויס צו פאררעכטן די “דרעינידזש” סיסטעם אויף די 'ריטי' גאס.

דאס איז אבער זייער א טייערע פראיעקט וואס וואלט געפאלן ווי א שווערע לאסט אויף די שטייער צאלער.

אויף דעם האט ווידער געמאלדן א גוטע בשורה:

נאך א פרישע גראנט פון 100,000 דאלאר!

די געלט וועט גיין דירעקט צו מאכן א געהעריגע סיסטעם וואס זאל קענען קאנטראלירן דאס רעגן וואסער און פארהיטן פון פלייצונגען און שאדנס.

"איך בין זייער צופרידן צו קענען העלפן פיערמאנט מיט די וויכטיגע פראיעקטן," האט אסעמבלימאן ווידער געזאגט.

"דאס וועט באשיצן הייזער פון פארפלייצונגען, און נעמט אראפ דעם פינאנציעלן עול פון די ארטיגע איינוואוינער."

צום סוף האבן מעיאר מיטשעל און טראסטי גארדאן זיך שיין באדאנקט פאר זיין אומערמידליכע הילף.

זיי האבן אונטערגעשטראכן אז די שטיצע וועט מאכן א ריזיגן חילוק צו האלטן די פובליק געזונט און פריש און מסדר זיין לאנג יעריגע פראבלעמען אינעם שטעטל.