הונדערטער ניו יארקער האבן דינסטאג אינדערפרי נישט געקענט זיך פארבינדן מיט די 911 אפעריטארס, נאכדעם וואס עס איז פארגעקומען א גרויסער דורכפאל אין איינע פון די צוויי הויפט עמערדזשענסי צענטערס אין ניו יארק סיטי.

דער פראבלעם האט אפעקטירט איינע פון די קאל צענטערס פאר ארום זיבן שעה צייט, פון בערך 3:00 פארטאגס ביז 10:00 אינדערפרי.

אין די צייט זענען ארום 1,700 קאלס אדורכגעפאלן, וואס דאס איז בערך א דריטל פון אלע קאלס וואס זענען דעמאלט אריינגעקומען.

שטאטישע באאמטע שאצן אז ארום 400 מענטשן האבן באמת נישט געקענט צוקומען צו 911.

די איבעריגע קאלס פון דעם גרויסן נומער זענען אריינגערעכנט אויטאמאטישע אלארמס, ווי אויך מענטשן וואס האבן פשוט געקלינגען נאכאמאל און נאכאמאל נאכדעם וואס מ'האט זיי נישט אויפגעהויבן דאס ערשטע מאל

 דער פראבלעם איז געווען אז ביי אסאך פון די קאלס האבן דער רופער און דער 911 אפעריטאר זיך פשוט נישט געקענט הערן איינער דעם צווייטן.

דאס איז א געפערליכע פראבלעם פאר איינעם וואס ברויך הילף פאר א מעדיצינישע עמערדזשענסי, א פייער, אדער אנדערע דרינגענדע זאכן.

ניו יארק סיטי האט צוויי עמערדזשענסי צענטערס איינס אין די בראנקס, און די הויפט-צענטער אין דאונטאון ברוקלין.

די צענטער אין די בראנקס דינט טיילווייז אלס א 'בעקאפ', אבער עס איז נאך דערווייל נישט קלאר צי די קאלס וואס זענען אדורכגעפאלן זענען טאקע אריבערגעפירט געווארן צום ברוקלינער צענטער אזוי ווי עס וואלט געדארפט זיין.

די באאמטע ווייסן נאך נישט וואס פונקטליך עס האט געפירט צו דעם קראך.

די פאסירונג האט אויפגעוועקט גרויסע זארגן איבער ווי ווייט מען קען זיך פארלאזן אויף די שטאטישע עמערדזשענסי סיסטעם, וואו אפילו די קלענסטע פארהאלטונג צו דערגרייכן הילף קען חלילה זיין קריטיש. די זאך ווערט ווייטער אויסגעפארשט.