מדבריו המורגשים: "איך קען אייך נישט גענוג ארויסברענגן ווי שטאַרק איך בין אייך מקנא" – נסיעה באַגלייט מיט אינטערעסאַנטער באַזוך ביי מלכות דזשודעיקא און רייכע מסיבה פאר די תשב"ר

ווידעראַמאָל האָבן די געוואונער פון צווישן די הונדערטער תשב"ר פון דאָהי אין וויליאַמסבורג, וואָס האָבן זיך אָנגעשטרענגט אַרומצוגיין מיט פּושקע-זעקל פון "כולל חבת ירושלים" געהאַט די זכי' און פּריוויליגיע מיטצוהאַלטן דעם אייגנאַרטיגן התרגשות'דיגן באַזוך ביי כ"ק אדמו"ר מבית חיים יהושע שליט"א, וועלכער האָט אויפגענומען די קינדער מיט אן אויסטערלישן וואַרעמקייט, און זיי מחזק געווען בעבודת הקודש לטובת די הייליגע צדקה פון "צדקת רבי מאיר בעל הנס".

ווי שוין איינגעפירט אין די לעצטע יאָרן, נעמט מען ספּעציעל צוזאַם די קינדער וואָס האָבן במשך די זומער חדשים אָדער במשך השנה, מצליח געווען אַריינצוברענגען גרויסע סכומים פאר "צדקת רבי מאיר בעל הנס כולל חבת ירושלים" ולרגל ההילולא פון הרה"ק בעל דברי חיים מצאַנז זי"ע – וואָס הוא ויוצ"ח הק' אחריו זענען געווען אַזוי מקושר צו די הייליגע צדקה – פאָרט מען אַריבער אויף א באַזוך צו איינעם פון נכדיו ממשיכי דרכו פון וועמען די קינדער הערן דברי חיזוק והתחזקות על פעלם הטוב.

דאָס יאָר האָבן די תשב"ר געהאַט די זכי' אויפגענומען צו ווערן דורכ'ן זקן האדמורי"ם כ"ק אדמו"ר מבית חיים יהושע שליט"א אויף וואָס די קינדער האָבן אַרויסגעקוקט מיט גרויס התרגשות.

מ'האָט קודם באַזוכט ביי די באַרימטע "מלכות דוזשדעיקא" ווי די קינדער האָבן געהאַט די געלעגענהייט מיטצוהאַלטן פונדערנאָנט דעם גאַנצן סדר וויאַזוי א "פּרוכת" ווערט געוועבט, פון אָנהייב אַראָפּ פון די בהמה ביז ווען עס איז שוין גרייט אויפגעהאָנגן צו ווערן אויפ'ן ארון הקודש פון ביהמ"ד, און אַזוי אויך האָט מען געוויזן פארשידענע שיטות פון תכלת, נוסחאות התפלה, מנהגים אויף קיטלען, עטרות א.א.וו.

דאַן איז מען צוגעפאָרן צום ספּעציעלן לאָקאַל, וואו מ'האָט סערווירט פאר די קינדער א סעודה, דאַן איז געקומען דער הויכפּונקט, ווען מען איז ערשינען בביתו נאוה קודש פון כ"ק אדמו"ר מבית חיים יהושע שליט"א, וועלכער האָט שווער געקענט איינהאַלטן רגשי לבבו, און מיט טרערן אין די אויגן אַרויסגעברענגט פאר די קינדער "איך קען אייך גאָרנישט מסביר זיין ווי איך בין אייך מקנא אַז איר האָט די זכי' צו טון פאר אַזאַ הייליגע צדקה".

אַזוי האָט דער רבי מאריך געווען בדברות קודש מיטן אייגנארטיגן טעם און פארצייטישן חן, און נאָנט צו א האַלבע שטונדע פאָרגעשטעלט פאר די קינדער די קדושה פון די הייליגע צדקה און ווי וואַרעם עס איז געווען מקובל ביי אבותינו ורבותינו אשר מפיהם אנו חיים, אויספירענדיג מיט ברכות לרוב פאר די טייערע קינדער.

נאָך די דברות קודש זענען די קינדער אַריבער מקבל צו זיין מברכת צדיק, און דער רבי שליט"א האָט יעדן איינעם איבערגעגעבן א מטבע לשמירה ולהצלחה.

דער מעמד איז געווען א זעלטן רייכער איבערלעבעניש וואָס וועט אויף לאַנג בלייבן אין זכרון פון די תלמידים.