קרית פאפא, וועסטשעסטער – אין א זעלטענע ערשיינונג איז פארגעקומען גאר א דערהויבענע ראש חודש אלול טיש "בהיכלא דמלכא" בביתו נאוה קודש פון כ"ק מרן אדמו"ר מפאפא שליט"א, וועלכע איז געווען א באזונדערע דערגרייכונג פאר די הנהלה פון די צענטראלע פאפא כולל אין וויליאמסבורג, וואס זענען נארוואס אריינגעשפרינגען אין א פארצווייגטע אונטערנעמונג, צו איבערבויען און פארטאפלען דעם היכל הכולל, וואס געפינט זיך אויף די העכסטע שטאק פון בית המדרש הגדול פאפא אויף בעדפארד עוו.

צו די באשטימטע צייט זענען זיך צוזאמענגעקומען די קרואי מועד ואנשי שם, וואס זענען פערזענליך גערופן געווארן דורכן שטוב פון רבי'ן שליט"א, וועלכע האט זיך ספעציעל אריינגעלייגט אין די ארבעט לטובת די חשובע רבני ולומדי הכולל, ווי דעם רבינ'ס שטוב איז גלייך געווארן אנגעפילט מיט די איינגעלאדענטע נדיבי עם הי"ו, וועלכע זענען געקומען מיט אן התרגשות דקדושה, מיט א גרייטקייט אנטקעגן צו קומען דעם פערזענליכן רוף פון רבם ומאורם שליט"א.

אנגעפירט די מסיבה האט דער באקאנטער יו"ר מו"ה ר' מאיר מרדכי בערקאוויטש הי"ו, וואס איז באקאנט פאר לאנגע יארן מיט זיינע טרעפליכע רעיונות לטובת נדיבי עם, ווי ער האט ארויסברעגענדיג די חשיבות פונעם חשוב'ן כולל, ווי ער איז פערזענליך באקאנט זייענדיג א משפחה מיטגליד מייט עטליכע לומדי הכולל.

במשך דעם סעודה האט אויפגעטרעטן מיט א גאר רייכע און תוכנ'פולע דרשה דער ראש הכולל הגה"צ רבי לוי יצחק גרינוואלד שליט"א דומ"ץ פאפא ב"פ זוהן פון רבי'ן שליט"א. 

אויך האט אויפגעטרעטן הרה"ח משה הלל סאמעט הי"ו לאנגיעריגע חבר הנהלת הכולל ומחשובי חסידי פאפא, מיט גאר טרעפליכע דיבורים וואס ער אליין איז געווען בעובי הקורה נאך מאז ומקדם, און שטייט ווייטער לימין עוז פון די נייע חברי הנהלת הכולל הי"ו, ווי ער האט איבערגעגעבן א באריכט פון די רבני ולומדי הכולל וועלכע זענען זיך ממית באהלה של תורה מתוך הדחק.

בין הדברים איז ארויסגעברענגט געווארן פאקטן ארום דעם כולל וואס האלט שוין אן אריבער 50 יאר כולן שוין לטובה נאכן התייסדות דורך כ"ק אדמו"ר הגה"ק מפאפא זצוק"ל, און אז דער ביז איצטיגער היכל הכולל – היכל אבערלענדער - איז שוין פון לאנג צר מהכיל, און קען מער נישט דערהייבן די בליענדע מספר הלומדים בליעה"ר כ"י, און מ'איז דעריבער געצווינגען צו ארייננעמען נאך א שטח – דער דערנעבנדיגער בנין, צו פארגרעסערן דעם כולל אויף טאפלט!

ברם זכור לטוב די פרישע אינגעלייט וועלכע זענען נתמנה געווארן דורך כ"ק אדמו"ר מפאפא שליט"א אלס "חברי הכולל" וואס האבן זיך אונטער גענומען דעם גאנצן פראיעקט – וואס וועט אפקאסטן ריזיגע סכומים, וואס פקודתם שמרה רוחם ארומצוגיין צו די ווארימע נדיבי עם, און פינאנצירן דעם היסטארישן פראיעקט, וואס דארף דרינגענד פארענדיגט ווען בעוד מועד צוליב די ביטול תורה וואס דאס קען ח"ו גורם זיין פאר די לומדי ורבני הכולל.

באזונדער זענען די חשוב'ע נגידים הי"ו ארויס פון התפעלות ביים באטראכטן די פלענער פונעם קאסטבארן פראיעקט מרחיב צו זיין די גבולי הקדושה, צו גענצליך רענאווירן און  פארברייטערן אויך דעם עקזעסטירענדע היכל הכולל, און דערביי פריש בויען באזונדערע נייע טרעפ ארויפצוקומען גלייך פון די גאס (אנשטאט דורכקלעטערן די מנינים פון ביהמ"ד), נייע קאווע שטיבל, ריזיגע אוצר הספרים, פרישע ביה"כ און סינקס, אפיס פארן ראש הכולל, הערליך נייע טישן און בענק כראוי וכיאות פאר די בני תורה.

דערנאך האט מען מקבל געווען ביותרת הכבוד את פני הוד כ"ק מרן אדמו"ר מפאפא שליט"א, ווי דער רבי שליט"א האט זיך געוואשן צום טיש לכבוד ר"ח, און דאן משמיע געווען גאר תוכן'פולע דברות קודש, ווי דער רבי שליט"א האט ארויסגעהויבן די חשוב'ע אינגעלייט וועלכע לערנען תורה בהתמדה רבה און זענען אנגעזאפט פול מיט יראת שמים, וואס ווי באקאנט קומט דער רבי שליט"א אסאך ארויף אין כולל און איז זיך משתשע מיט די אינגעלייט, אזוי אויך געבט דער רבי שליט"א אוועק לאנגע שעות צו פארהערן די חשובע אינגעלייט אויף אלע זייערע מקצועות.

ביים סיום דבריו האט דער רבי שליט"א גאר ווארעם אנגעוואונטשן די חשוב'ע נדיבים וועלכע טוען ערמעגליכן די איצטיגע בוי פראיעקט, אז דער זכות התורה ולומדי' זאל זיי באגלייטן לעולמי עד, און זיין האפענונג אז מ'זאל פארענדיגן ווי שנעלער דעם פראיעקט כדי צו פאמיידן ביטול תורה און פיזור הנפש צוליב די בוי ארבעט, (ווי מ'דארף טוישן דעם צייטווייליגן מקום יעדע פאר וואכן).

נאך די ווארימע דברות קודש און דברי ברכה, האבן אלע נדיבים געהאט די זכי' אריבערצוגיין אל מול פני הקודש, און פערזענליך איבערגיין מיטן רבי'ן שליט"א די "שטרי הסכם" ווי מ'האט זיך אונטערגענומען זכותים נצחיים בבית ה', וואס דער רבי שליט"א האט אין א זעלטענע שריט פארזענליך גע'חתמ'ט אויף יעדן שטר באזונדער, און במאור פנים אנגעוואונטשן פאר יעדן נדיב החשוב ברכות לרוב.

מטעם הנהלת הכולל ווערט איבערגעגעבן די בשורה מרנינה אז ביים מעמד אויפן פלאץ, איז בס"ד פארקויפט געווארן רוב זכותים פונעם פרישן פראיעקט וואס וועט בעז"ה ערמעגליכן צו שנעל פאראויסרוקן דעם גאנצן בוי ארבעט, און זיין גרייט כליל בהדרו אויף קומענדיגע שנת הלימודים חורף תשפ"ד הבעל"ט.

אזוי ווי די הנהלת הכולל שפארט נישט קיין געלט פארן באקוועמליכקייט פון די לומדי הכולל, און עס דארף נאך געשאפן ווערן ריזיגע סכומים געלט, קען מען זיך ווענדן צו די חברי הנהלת הכולל הי"ו, און זיך אנשליסן אינעם קאמפיין  - וואס אזא געלעגנהייט מאכט זיך נישט יעדן טאג, ווי דער זכות עצום וועט אוודאי מגין זיין אויף אלע מחזיקי תורה לעד ולנצח נצחים.

עץ חיים הוא למחזיקים בה ותוכי' מאושר.