בס"ד

דראמאטישע רעסקיו אפעראציע אין איראן: אמעריקאנער מיליטער גיט ארויס דעטאלן איבער די קאמפליצירטע ראטעוועונג פון אן אמעריקאנער פיילאט

די אמעריקאנער 'דעפארטמענט אוו דעפענס' האט ארויסגעגעבן פרישע דעקלאסיפיצירטע ווידעא רעקארדירונגען, וואס זענען אויך געוויזן געווארן אויף די באקאנטע '60 מינוט' פראגראם, וואס צייגט די העראישע אפעראציע צו ראטעווען אן אמעריקאנער עיר-פארס אפיציר טיף אינעם איראנער טעריטאריע.

דער אינצידענט האט זיך אנגעהויבן דעם 2'טן אפריל 2026, ווען אן אמעריקאנער עפ-15 קאמפס-עראפלאן איז אראפגעשאסן געווארן דורך אן איראנער מיסיל. די צוויי פיילאטן, וועלכע ווערן אנגערופן מיט די קאוד-נעמען "אלפא" און "ברעווא", האבן זיך ארויסגעשאסן פונעם עראפלאן. בעת "אלפא" איז געראטעוועט געווארן פריער אין א באזונדערע אפעראציע בייטאג און איז שוין צוריק צו זיין פאזיציע אין די עיר-פארס, האט "ברעווא" געליטן פון א צובראכענע רוקן, ארעם און אקסל, נאכדעם וואס זיין פאראשוט איז געשעדיגט געווארן און ער איז געפאלן צום ערד מיט א שנעלקייט.

פאר קנאפע 50 שעה האט דער פארוואונדעטער "ברעווא" זיך באהאלטן און אויסגעמיטן די איראנער קרעפטן אין די בערגיגע געגנטער דרום פון די שטאט איספאהאן. אין איין פונקט איז ער געווען בלויז עטליכע הונדערט מעטער אוועק פון ווערן געכאפט דורך די איראנער, ביז די אמעריקאנער קרעפטן האבן אים ענדליך דערווישט און ארויסגעראטעוועט זונטאג פארטאגס.

די ארויסגעגעבענע דעטאלן צייגן די ריזיגע פארנעם פון די אפעראציע. מער ווי 90 אמעריקאנער זעלנער האבן געלאנדעט אויף איראנער באדן — דאס ערשטע מאל וואס אמעריקאנער טרופן טרעטן אויף איראנער ערד אין 46 יאר! דאס איז געווען אין צוגאב צו הונדערטער פערסאנאל אין די לופטן און טויזנטער אנדערע וואס האבן ארויסגעהאלפן פון אונטער די קוליסן.

די רעסקיו טיעמס האבן זיך פלאצירט אין א פראוויזארישע לופט-באזע אינעם מדבר, פון וואו ספעציעלע קרעפטן האבן דערגרייכט דעם פיילאט מיט די הילף פון 'ליטל בירד' העליקאפטערס. אינעם לויף פון די אפעראציע איז אמווייניגסטנס איין אמעריקאנער עראפלאן פארניכטעט געווארן דורך די אמעריקאנער זעלבסט, כדי צו פארמיידן אז אירע סענסיטיווע טעכנאלאגיע זאל אריינפאלן אין איראנער הענט.

די אמעריקאנער 'סענטקאם' (צענטראלע קאמאנד) האט אראפגעמאלן די העראישע אקציע אלס איינע פון די מערסט קאמפליצירטע קאמפס-רעסקיו אפעראציעס אין די מאדערנע מיליטערישע היסטאריע, אונטערשטרייכנדיג די פעסטע היסטארישע פרינציפ פונעם אמעריקאנער מיליטער אז "מען לאזט קיינמאל נישט איבער קיין זעלנער אויפן שלאכטפעלד".