בס"ד

אומאן: קורצע סעקיוריטי שרעק נעבן ציון פון ר' נחמן מברסלב נאכדעם וואס א פארדעכטיגטע פעקל איז געטראפן געווארן

א קורצע סעקיוריטי אלארם האט זיך אפגעשפילט נעבן דעם ציון פון הרה"ק ר' נחמן מברסלב זי"ע אין אומאן, נאכדעם וואס אן איבערגעלאזטע פעקל איז באמערקט געווארן גאר נאנט צום ציון, בלויז געציילטע שעה'ן בעפארן אריינקום פונעם יום טוב ראש השנה.

לויט באריכטן פון 'בעלאז', האבן די ארטיגע אטאריטעטן און פאליציי רעאגירט גאר שנעל און אונטערגעזוכט דעם פארדעכטיגטן פעקל, אין די צייט וואס ריזיגע מאסן אידן האבן זיך געפונען אינעם גאנצן ארומיגן געגנט.

בחסדי השם האט זיך דער אינצידענט געענדיגט אן קיין שום סכנה, ווען עס האט זיך ארויסגעשטעלט אז דאס איז בלויז געווען אן איבערגעלאזטע 'אושר עד' שאפינג בעג וואס האט נישט געשטעלט קיין שום פראבלעם.

די קורצע שרעק קומט אין א צייט פון גאר שטרענגע סעקיוריטי מאסנאמען ארום דעם היי-יעריגן 'קיבוץ' אויף ראש השנה. די אוקראינישע אטאריטעטן האבן איינגעשטעלט ספעציעלע זיכערהייט שריט איבער די גאנצע געגנט, אריינגערעכנט טשעקפוינטס, באגרעניצונגען אויף באוועגונגען, און א פארמערטע פאליצייאישע אנוועזנהייט, בשעת טויזנטער אידן האלטן נאך אינמיטן אנקומען קיין אומאן.