שאקירנדע באריכט: אייער LG סמארט סקרין שפיאנירט נאך אייך אפילו ווען עס איז פארלאשן

א מאנאטן-לאנגע אויספארשונג צייגט אז געוויסע LG סקרינס רעקארדירן שמועסן און סקענען די לאקאלע וויי-פיי נעטווארק, אפילו ווען די דעווייס איז אויף 'סטענדביי'.

נאך אן אויספארשונג וואס האט געדויערט עטליכע מאנאטן, דורכגעפירט דורך די טעכנאלאגיע גרופע 'געימערס נעקסוס' (Gamers Nexus) אינאיינעם מיט אנדערע סעקיוריטי עקספערטן, איז אנטפלעקט געווארן א שוידערליכע פאקט: געוויסע LG OLED סמארט טעלעוויזיעס סקענען כסדר די היים נעטווארקס און כאפן אויף קולות פונעם מייקראפאן, אפילו ווען די סקרין זיצט אין 'סטענדביי' מאוד און קיינער נוצט עס נישט.

די עקספערטן האבן אינוועסטירט ארום 70,000 דאלאר און 500 שעה צו טעסטן די מאדעלן, אריינגערעכנט די פלעגשיפ G5 מאדעל. זיי האבן גענוצט ספעציעלע טולס ווי Wireshark צו זען פונקטליך וואס די דעווייסעס שיקן ארויס. וואס זיי האבן געטראפן איז געווען דעטאלירטע לאגס פון לאקאלע וויי-פיי (Wi-Fi) נעמען, סיגנאל שטארקייט, און א ליסטע פון אנדערע דעווייסעס אויפן זעלבן נעטווארק ווי סמארטפאונס, סמארט-וואטשעס און פרינטערס וואס באלאנגען צו מענטשן וואס האבן בכלל נישט געהאט קיין שייכות צו די טעסטס. דער הויפט רעדאקטאר פון געימערס נעקסוס, סטיוו בוירק, האט עס אנגערופן "א שרעקליכע אריינרייסונג אין פריוואטקייט".

רעקארדירט אן אינטערנעט קאנעקשאן

די מערסט שאקירנדע טייל פון די אויספארשונג איז וואס פאסירט מיט די קולות וואס ווערן רעקארדירט. די ריסוירטשערס האבן געטראפן פיילס וואס האבן איבערגעטייטשט גערעדטע ווערטער צו טעקסט, אריינגערעכנט שמועסן וואס זענען ווייטער רעקארדירט געווארן פאר ארום 10 ביז 15 סעקונדעס נאכדעם וואס מ'האט שוין געענדיגט געבן א קאמאנד.

נאך מער, די טעסטס האבן געוויזן אז די מייקראפאן האט ווייטער רעקארדירט אפילו ווען די סקרין איז געווען אויף סטענדביי און די אינטערנעט קעיבל איז געווען פיזיש ארויסגעצויגן. די אודיאו פיילס זענען געבליבן סעיווד אויפן דעווייס ביז די אינטערנעט איז צוריק אנגעצינדן געווארן, און דעמאלטס האט זיך עס אטאמאטיש ארויפגעלאדנט (אפלאודעד). די אלע דאטא ווערט אריינגעפיטערט אין LG's סיסטעם צו בויען א דעטאלירטע פראפיל אויף די קאסטומערס פאר זייערע עדווערטייזמענט קאמפאניס.

לעכער אין די סיסטעם

פון איר זייט האט LG שוין פריער געזאגט אז זייערע סקרינס רעקארדירן נישט קיין פריוואטע שמועסן, און אז די וואויס פיטשער צינדט זיך נאר אן ווען מ'זאגט א ספעציפישע ווארט. אבער די אויספארשער זאגן אז אפילו אויב טעכניש זענען זיי גערעכט, כאפט די סיסטעם אויף אסאך מער ווי א נארמאלע מענטש וואלט ערווארטעט.

צו מאכן די זאך נאך ערגער, האבן די ריסוירטשערס אויך געטראפן 'באגס' און לעכער אין די סאפטווער וואס קען טעארעטיש לאזן העקערס אנצינדן דעם מייקראפאן אן דעם וואס דער אייגנטומער זאל בכלל באמערקן, בעת די סקרין זעט אויס אינגאנצן פארלאשן.

וואס קען מען טון?

מיט א געשאצטע 216 מיליאן LG סמארט סקרינס אין באנוץ איבער די וועלט, איז די פראבלעם גאר אן ערנסטע. סעקיוריטי עקספערטן ראטן אז באנוצער זאלן אריינגיין אין די סעטינגס און אויסלעשן די 'וואויס רעקאגנישן' (voice recognition) און אנדערע דאטא-זאמלונג פיטשערס. פאר די וואס ווילן זיין קלוגער און מער פארזיכטיג, איז די בעסטע עצה אינגאנצן אפצוהאקן די סקרין פונעם אינטערנעט און ענדערש נוצן אן עקסטערע דעווייס צו סטרימען.

דערווייל האט LG נישט צוגעשטעלט קיין געהעריגע ענטפער אויסער זייער אלטע סטעיטמענט אז זיי הערן נישט אויס קיין שמועסן, איבערלאזנדיג קאסטומערס מיט די שווערע באווייזן פון די אויספארשונג קעגן די הבטחות פון די קאמפאני.